فوتو: http://img.tyt.by

رەسەي ۆەنەسۋەلاعا اسكەرىن جىبەردى. بۇل تۋرالى Reuters حابارلادى.

24 ناۋرىزدا كاراكاسقا ءجۇز رەسەيلىك اسكەري جانە 35 توننا جۇگى بار يل-62, Aن-124 ۇشاقتارى قونعان. ۆەنەسۋەلا باسىلىمدارى «قوس تاراپتىڭ ەكىجاقتى كەڭەس جۇرگىزەتىندىگىن» جازدى. ال رەسەي تاراپى بۇعان قاتىستى تۇسىنىكتەمە بەرگەن جوق.

رەسەيلىك ۇشاقتار كاراكاسقا بىرنەشە مارتە كەلگەن بولاتىن. «ۋنيۆەرسال» ۆەنەسۋەلا باسىلىمىنىڭ حابارلاۋىنشا، رەسەيدەن جەتكەن ناتو Blackjack دەپ اتالاتىن تۋ-160 ۇشاقتارى يادرولىق قارۋمەن دە، جاي قارۋمەن دە جابدىقتالادى. سۇرياداعى رەسەي اۆياتسياسىنىڭ رەيدىندە وسى سىندى بىرنەشە بومبالاۋشى ۇشاق ح-101 قاناتتى زىمىراندارىن اتقان.

وسىعان دەيىن، ياعني 11 جەلتوقساندا رەسەيگە ۆەنەسۋەلا پرەزيدەنتى نيكولاس مادۋرو مەن قورعانىس مينيسترلىگىنىڭ باسشىسى لوپەس بارعان بولاتىن. رەسەي قورعانىس ءمينيسترى سەرگەي شويگۋ سول كەزدە رەسەي اسكەري اۆياتسياسىنىڭ ۆەنەسۋەلا اەرودرومدارىنا ۇشۋ پراكتيكاسى جالعاساتىنىن، ال رەسەي ۆمف كەمەلەرى وسى ەلدىڭ پورتتارىنا كىرەتىنىن مالىمدەگەن. سول ۋاقىتتان بەرى رەسەيلىك ۇشاقتار ۆەنەسۋەلا اسكەري قىزمەتشىلەرىمەن بىرلەسكەن وقۋ-جاتتىعۋلارعا قاتىسىپ كەلەدى.

ايتا كەتەيىك، ناتو مەن ەو قۇرامىنداعى مەملەكەتتەر جانە اقش نيكولاس مادۋرونى مەملەكەتتىڭ زاڭدى باسشىسى دەپ سانامايدى. ەۋروپارلامەنت جانە وزگە دە مەملەكەتتەر ءوزىن پرەزيدەنت مىندەتىن اتقارۋشى دەپ جاريالاعان ۆەنەسۋەلا وپپوزيتسيالىق پارلامەنتىنىڭ كوشباسشىسى (ۇلتتىق اسسامبلەيا) حۋان گۋايدونى ەلدىڭ ليگيتيمدى باسشىسى رەتىندە تانىدى. ال رەسەي جانە قىتاي «ديكتاتور باسشى» اتانعان ماۋدروعا قولداۋ ءبىلدىردى.