فوتو: ريا نوۆوستي

قىتاي بيلىگى شىڭجاڭ ۇيعىر اۆتونومياسىندا «ءۇش باعىت بويىنشا» كۇرەستى كۇشەيتپەك.

«سينحۋا» اقپارات اگەنتتىگىنىڭ مالىمەتىنشە، قىتاي مەملەكەتتىك كەڭەسى شىڭجاڭ ۇيعىر اۆتونومياسى اۋماعىندا تەرروريزم، ەكسترەميزم جانە سەپاراتيزممەن كۇرەس جۇرگىزۋىن كۇشەيتەتىندىگى جونىندە جازىلعان «اق كىتاپ» جاريالاعان.

«قىتاي ۇكىمەتى تەرروريزم جانە ەكسترەميزمنىڭ كەز كەلگەن تۇرىمەن قالىپتاسقان زاڭ شەڭبەرى اياسىندا كۇرەس جۇرگىزەتىن بولادى. بۇعان ادام قۇقىعىنا قارسى كەلەتىن تەراكتىلەردى ۇيىمداستىرۋ مەن جۇزەگە اسىرۋدىڭ بارلىق تۇرلەرى كىرەدى. تەرروريزم مەن ەكسترەميزم ايماق تۇراقتىلىعىنا نۇقسان كەلتىرۋدە. سالدارىنان شىڭجاڭ ۇيعىر اۆتونوميالىق اۋدانىنداعى از ۇلتتاردىڭ بارلىعى جاپا شەگۋدە» - دەلىنگەن «اق كىتاپتا».

بۇدان بولەك قىتاي مەملەكەتتىك كەڭەسى تاراتقان مالىمدەمەدە، 1999 جانە 2016 جىلدارى ارالىعىندا ايماقتا مىڭعا جۋىق ەكسترەميستىك شابۋىل جاساۋ فاكتىلەرى تىركەلگەندىگى جونىندە ايتىلعان.

قىتايداعى از ۇلتتاردىڭ قىسىم كورۋىنە قاتىستى اقپاراتتار 2016 جىلدان بەرى الەمدىك باق بەتتەرىنەن تۇسپەي كەلەدى. وسى ۋاقىت ارالىعىندا بۇل ماسەلە قازاقستاندى دا اينالىپ وتكەن جوق. سوڭعى ەكى جىلدا قازاق قوعامىندا «قىتايدا قىسىم كورىپ جاتقان قازاق» ماسەلەسى قىزۋ تالقىلانۋدا جانە ازىرگە تولىقتاي ءوز شەشىمىن تاپقان جوق.

"The Qazaq Times"