نەمىستەر: گرەكيا قارىزىن وتەسىن، وداقتان شىعىپ كەتسىن

نەمىس قوعامدىق-عىلىمي زەرتتەۋ ورتالىعى مەن دەرەكتەردى ساراپتاۋ اگەنتتىگىنىڭ جاساعان ەڭ جاڭا ساۋالناما ناتيجەسى، گەرمانيالىقتاردىڭ گرەكتەرگە جاناشىرلىق كورسەتپەيتىنىن دالەلدەدى. ولار گرەكيا ەو-عا بولعان بورىشىن قالايدا وتەۋ كەرەك دەپ وتىر. ساۋالناماعا قاتىسقان گەرمانيالىقتاردىڭ جارتىسىنان كوبى گرەكيانى ەو-دان شىعارىپ تاستاعىسى كەلەدى.

رەسپوندەنتتەردىڭ 52 پايىزى گرەكيانى ەۋروپالىق وداقتان شىعارىپ تاستاۋ كەرەك دەگەن پىكىرگە كەلىسكەن. وسىمەن قاتار 53 پايىز رەسپوندەنت گرەكيانى ەو الدىنداعى بورىشىن وتەۋگە مىندەتتى دەپ تاپقان. سونداي-اق، شينحۋا (سينحۋا) اگەنتتىگىنىڭ ەكونوميكا سايتى گەرمانيا “Blid” باسىلىمى جاريالاعان تاعى ءبىر ساۋالناماعا سىلتەمە جاساي وتىرىپ حابارلايدى،   بۇندا دا قاتىسۋشىلاردىڭ كوبى ەگەردە، گرەك ەلىنە بورىشىن كەشىرىم ەتۋ جولعا قويىلسا، وندا وزگە ەو-عا مۇشە ەلدەرگە ادىلەتسىزدىك جاساۋمەن بىردەي دەپ قاراعان.

گەرمانيا قارجى ءمينيسترى شويبلە وسىدان بۇرىن: «ەۋروايماققا مۇشە ەلدەر، بورىشتىلىعىنان جەڭىلدىك الا المايدى، سەبەبى، بارلىق ەو مۇشەلەرىنىڭ مۇددەسى توعىسىپ جاتىر. ولار ءوز بورىشتارىنا جاۋاپتى بولۋى كەرەك. گرەكيا بورىشىنان كەشىرىم العىسى كەلسە، وندا ەۋرو وداقتان شىعۋىنا تۋرا كەلەدى»، – دەگەن بولاتىن. حالىقارالىق ۆاليۋتا قورىنىڭ (حۆق) پرەزيدەنتى لاگارد وتكەن اپتادا گەرمانيا كانتسلەرى انگەلا مەركەلمەن بەرليندە وتكەن كەزدەسۋىنەن كەيىن، گرەكيانىڭ قارىزدارىن قايتا قۇرىلىمداۋ قاجەتتىلىگىن، ول ەلدەگى زەينەتاقى مەن سالىق جۇيەسىنە جاسالاتىن رەفورمانى جەدەلدەتۋ كەرەكتىگىن ايتتى.

ۇلىبريتانيانىڭ ەو-دان باس تارتۋى، گەرمانيا مەن فرانتسياعا اۋىر جۇك سالدى. ەۋروايماقتاعى ەكونوميكاسى ءبىر دەڭگەيدە ەمەس كوپتەگەن ەلدەردىڭ سالماعى ەندىگى جەردە فرانتسيا مەن گەرمانياعا ارتىلادى. ەۋروپالىق وداق كۇننەن-كۇنگە ەكونوميكاسى قۋاتتى ەلدەرگە سالماق تۇسىرۋدە. ەسەسىنە سالىستىرمالى كەدەي ەلدەر ماسىل بولۋدان اسا الماي وتىر. جىل سوڭىنا دەيىن بۇل قالىپتى وزگەرتەتىن جاڭا ءبىر جوبالار جولعا قويىلماسا، كەلەسى جىلدان تارتىپ ەو-دان باس تارتۋ كەزەگى گەرمانيا مەن فرانتسياعا كەلەدى. اسىرەسە، فرانتسۋزداردىڭ اراسىندا وداقتان باس تارتقىسى كەلەتىندەر نەمىستەرگە قاراعاندا كوبىرەك. فرانتسيادا بولىپ جاتقان ساياسي وزگەرىستەر سول ەلدى وداقتان الىپ شىعار بولسا، ءبىر نەمىستىڭ كۇشىمەن ەۋروايماقتى تۇتاستىرىپ تۇرۋ مۇمكىن بولمايدى.

“The Qazaq Times”