فوتو: https://www.inform.kz

قازاقستاننىڭ كەي ايماقتارىندا قىزىلشا اۋرۋى بەلەڭ الىپ كەلەدى. سوڭعى ءۇش ايدا جامبىل وبلىسىندا قىزىلشا اۋرۋىن جۇقتىرعاندار سانى ءۇش ەسەگە ارتقان.

مالىمەتتەر بويىنشا، اۋىرعانداردىڭ دەنى ەكپە الۋدان باس تارتقاندار مەن ۆاكتسينا الۋ جاسىنا جەتپەگەن بالالار. بۇگىنگە دەيىن ەكپە العانى تۋرالى ەشبىر مالىمەت جوق 691 ادامعا ەكپە جاسالعان. جىل باسىندا 1 جاسقا دەيىنگى جانە 6 جاستاعى تاعى 3 مىڭعا تارتا بالاعا قىزىلشاعا قارسى ەكپە سالىنعان. مالىمەتتەر بويىنشا، اقپاندا جامبىل وبلىسى بويىنشا وسى اۋرۋعا قىرىق ادام شالدىقسا، قازىر ولاردىڭ سانى ءجۇز وتىزعا جۋىق. ولاردىڭ 100-گە جۋىعى بالا.
قازىرگى ۋاقىتتا ەپيدەمياعا قارسى شارالار قارقىن الىپ، تاۋلىك سايىن مونيتورينگ جاسالىپ جاتىر.

جالپى العاندا قازاقستاندا قىزىلشامەن اۋىرعانداردىڭ سانى كوبەيگەنى تۋرالى اقپارات 2018 جىلدىڭ سوڭىنا قاراي ايتىلا باستادى. دەرەكتەر بويىنشا، 22 قاڭتارعا دەيىن 700 ادام تىركەلگەن. ولاردىڭ كوبى - استانادا. ودان كەيىن شىمكەنت قالاسى مەن تۇركىستان، اتىراۋ، اقمولا وبلىستارى تۇر.

قاڭتاردىڭ باسىندا اقش-تىڭ اۋرۋدى باقىلاۋ جانە پروفيلاكتيكا ورتالىعى قازاقستاندا «قىزىلشانىڭ تارالۋىنا» بايلانىستى ەسكەرتۋ جاريالاعان بولاتىن. ەسكەرتۋدە «قازاقستانعا ساياحاتتاپ بارۋشىلار قىزىلشاعا قارسى ەكپە العانىنا كوزىن جەتكىزۋى كەرەك» دەپ جازىلعان. ال ەكپە الماعاندارعا ماماندار ارنايى ۆاكتسينا سالدىرۋعا كەڭەس بەرگەن. ورتالىق ەسكەرتۋدى ەڭ تومەنگى «جاسىل دەڭگەيلى» دەپ كورسەتىپ، قاراپايىم ساقتىق شاراسى ەكەنىن ايتقان.

"The Qazaq Times"