اق ءۇي: سولتۇستىك كورەيانىڭ نە ىستەپ جاتقانىن بىلەمىز

اقش پەن سولتۇستىك كورەيا باسشىلارى كەلىسىمگە كەلە الماعاننان كەيىن، الەم ەلدەرىنىڭ اقپارات كەڭىستىگىندە سولتۇستىك كورەيا زىمىران سىناقتارىن قايتالاۋعا دايىندالۋى مۇمكىن دەگەن بولجامدار كوبىرەك ايتىلدى. جەكسەنبى كۇنى ترامپ ۇكىمەتى جاساعان مالىمدەمە بۇنى جوققا شىعاردى.

وسىدان بۇرىن اقش-تاعى زەرتتەۋ ورتالىعى جاساندى جەر سەرىگىنەن تۇسىرىلگەن سۋرەتتەرىن العا تارتا وتىرىپ، سولتۇستىك كورەيانىڭ كەيبىر سىناق پوليگونىن قايتا قالپىنا كەلتىرىپ جاتقانىن ايتقان ەدى. اق ءۇي بۇل سۋرەتتەرگە تۇسىنىكتەمە بەرۋدەن باس تارتتى. بىراق، سولتۇستىك كورەيا  يادرولىق نەمەسە زىمىران سىناقتارىن قايتالاۋىن «فانتازيا» دەپ باعالاعان.

سولتۇستىك كورەياعا بايلانىستى بۇنداي مالىمدەمەنى اق ءۇيدىڭ ۇلتتىق قاۋىپسىزدىك جونىندەگى كەڭەسشىسى بولتون ءوزىنىڭ ABC ارناسىنداعى سۇحباتىندا ايتقان. ول قۇراما شتات تارابى سولتۇستىك كورەيانى «ۇزبەي باقىلاپ وتىرعانىن»، «كوممەرتسيالىق سپۋتنيكتىڭ سۋرەتتەرىنە بايلانىستى تۇسىنىكتەمە بەرە المايتىنىن» ايتقان.

بولتون سولتۇستىك كورەيا پوليگوندارىنا قاتىستى اق ءۇي رەسمي قورىتىندى جاسايتىنىن ەسكەرتتى. «ءبىز ولاردىڭ قازىر نە ىستەپ وتىرعانىن انىق بىلەمىز. ءار كۇنى بارلاۋ قىزمەتىنىڭ ەسەبىن قاراپ وتىرمىز»، – دەيدى بولتون.

جۇما كۇنى پرەزيدەنت ترامپ تا بۇعان قاتىستى ءوز پىكىرىن ءبىلدىردى. ول سولتۇستىك كورەيانىڭ بۇنداي قادامعا بارمايتىنىنا سەنەدى، ءارى سولتۇستىك كورەيا يادرولىق سىناقتاردى قايتالاسا بۇنىڭ «سولتۇستىك كورەيا ءۇشىن زاردابى اۋىر» بولاتىنىن ەسكەرتكەن.

پرەزيدەنت ترامپ سولتۇستىك كورەيا ماسەلەسىندە ءوزىنىڭ وباما ۇكىمەتىمەن سالىستىرا وتىرىپ، تابىستى سىناقتار جاساپ جاتقانىن ايتقان. ول سوزىندە: «مەن العاش قىزمەتكە كىرىسكەندە، وباما ۇكىمەتىنىڭ تۇسىندا سولتۇستىك كورەيا اپاتپەن بىردەي ەدى. سىزدەر بىلەسىزدەر مە، بىلمەيسىزدەر مە، اڭگىمە وندا ەمەس، ءبارىڭ تەك سوعىسقا قاراي كەتىپ بارا جاتقان ەدىڭدەر. مەن سول بىلىقپالىقتى قابىل الدىم. ەگەر سىناق بولماسا، ەشتەڭە دە بولمايدى. ەندى ءبىز نە بولىپ جاتقانىن قاراپ كورەيىك...»، – دەگەن.

“The Qazaq Times”