باسىنا ميلليون دوللار تىگىلگەن جاس بين لادەن الەمنىڭ ۇرەيىن ۇشىرۋدا

الەمدى شۋلاتقان «ءال-كايدا» تەررورلىق توبىنىڭ بۇرىنعى جەتەكشىسى ۋساما بين لادەننىڭ ۇلى حامزا بۇگىن بىرقاتار ەلدەردىڭ ۇرەيىن الۋدا. حامزا بين لادەن بالا جاسىنان جيھادتىق ارەكەتتەرگە قاتىسىپ، سول ورتادا تاربيەلەنىپ كەلگەنى بەلگىلى. بين لادەننىڭ وتباسىمەن تۇسكەن سۋرەتتەرى مەن بەينە جازبالاردىڭ كوبىندە بالا حامزا اۆتومات ۇستاپ تۇرادى. ءتىپتى ونىڭ 14 جاسىنان باستاپ «ءال-كايدا» قاتارىندا قارۋلى كۇشتەرمەن سوعىستارعا قاتىسقانى تۋرالى انىق دەرەكتەر بار.

مەملەكەتتىك دەپارتامەنت ونى «حالىقارالىق تەررورشى» جانە «ءال-كايدانىڭ» نەگىزگى جەتەكشىلەرىنىڭ ءبىرى رەتىندە مالىمەت تاراتقان. قۇراما شتاتتار حامزانىڭ جاسىرىنعان جەرى تۋرالى مالىمەت بەرگەن ادامعا 1 ملن اقش دوللارى كولەمىندە سىياقى دايىنداعان. سونىڭ وزىندە، حامزا بي لادەن تۋرالى دەرەكتەر تىم از.

«11 قىركۇيەك» وقيعاسىنان كەيىن ۋساما بين لادەنگە حالىقارالىق قۋعىنداۋ جاريالاندى، 2011 جىلى اقش ارنايى قىزمەتى ونى پاكىستاندا جاسىرىنعان تۇراعىندا كوزىن جويدى. بۇل كەزدە بالاسى حامزا دا ولگەن دەپ مالىمدەلگەن. الايدا، كەيىن ۋساما بين لادەنمەن بىرگە ولگەن حامزادان ۇلكەن ۇلى حاليد بين لادەن ەكەنى ءمالىم بولدى. حامزا 2012 جىلى عالامتوردا ءوزى جازعان پوەمالاردى جاريالاپ، ءوزىن شاراسىز جەر اۋدارعان جانە قورقىنىش پەن ۇرەي اراسىندا ءومىر سۇرگەن پاناسىز بالا رەتىندە سۋرەتتەگەن. بىراق ونىڭ جىل وتكەن سايىن «ءال-كايدا» ۇيىمى ىشىندەگى ىقپالىنىڭ ارتىپ كەلە جاتقانى بايقالۋدا.

حامزا بين لادەننىڭ الەمدى ۇرەيلەندىرگەن ۆيدەوسى 2015 جىلى جاريالاندى. وندا «ءال-كايدانىڭ» قازىرگى جەتەكشىسى ايمان ءال-زاۆاحيري ونى توپتىڭ مۇشەسى رەتىندە تانىستىردى جانە «ازۋى ءتىسى جەتىلگەن ارىستان» دەپ باعالادى. ۆيدەودا حامزا كابۋل، باعداد جانە گازاداعى «ءال-كايدا» سودىرلارىن اقش، ۇلىبريتانيا، فرانتسيا جانە يزرايلگە تەررورلىق شابۋىل جاساۋعا شاقىرعان. سونىمەن بىرگە، ساۋد ارابيالىق جاستاردى دا توپ قاتارىنا شاقىرىپ، ەل بيلىگىن قۇلاتۋعا ۇگىتتەگەن. اتالعان تەررورلىق ۇيىمعا ساۋد ارابيا جاستارى كوبىرەك قاتىسقانى ءمالىم.

بريتانيا لاۋازىمدىلارى حامزانى تەررورلىق توپ جەتەكشىسىنىڭ مۇراگەرى رەتىندە قارايدى. كوپتەگەن ساراپشىلار دا بولاشاقتا «ءال-كايدانىڭ» جەتەكشىلىگى حامزا بين لادەننىڭ قولىندا بولادى دەپ بولجايدى. حامزا ءوزىنىڭ جانە اكەسىنىڭ توپ ىشىندەگى، الەمدەگى جيھادشىلار اراسىنداعى بەدەلىنەن پايدالانىپ «ءال-كايدانى» قايتا كۇشەيتۋى مۇمكىن دەپ بولجانۋدا.

“The Qazaq Times”