Usama jäne Hamza bin Laden. Foto: Yahoo News.

Älemdi şulatqan «äl-Kaida» terrorlıq tobınıñ bwrınğı jetekşisi Usama bin Ladenniñ wlı Hamza bügin birqatar elderdiñ üreyin aluda. Hamza bin Laden bala jasınan jihadtıq äreketterge qatısıp, sol ortada tärbielenip kelgeni belgili. Bin Ladenniñ otbasımen tüsken suretteri men beyne jazbalardıñ köbinde bala Hamza avtomat wstap twradı. Tipti onıñ 14 jasınan bastap «äl-Kaida» qatarında qarulı küştermen soğıstarğa qatısqanı turalı anıq derekter bar.

Memlekettik departament onı «halıqaralıq terrorşı» jäne «äl-Kaidanıñ» negizgi jetekşileriniñ biri retinde mälimet taratqan. Qwrama Ştattar Hamzanıñ jasırınğan jeri turalı mälimet bergen adamğa 1 mln AQŞ dolları köleminde sıyaqı dayındağan. Sonıñ özinde, Hamza bi Laden turalı derekter tım az.

«11 qırküyek» oqiğasınan keyin Usama bin Ladenge halıqaralıq quğındau jariyalandı, 2011 jılı AQŞ arnayı qızmeti onı Päkistanda jasırınğan twrağında közin joydı. Bwl kezde balası Hamza da ölgen dep mälimdelgen. Alayda, keyin Usama bin Ladenmen birge ölgen Hamzadan ülken wlı Halid bin Laden ekeni mälim boldı. Hamza 2012 jılı ğalamtorda özi jazğan poemalardı jariyalap, özin şarasız jer audarğan jäne qorqınış pen ürey arasında ömir sürgen panasız bala retinde surettegen. Biraq onıñ jıl ötken sayın «äl-Kaida» wyımı işindegi ıqpalınıñ artıp kele jatqanı bayqaluda.

Hamza bin Ladenniñ älemdi üreylendirgen videosı 2015 jılı jariyalandı. Onda «äl-Kaidanıñ» qazirgi jetekşisi Ayman äl-Zavahiri onı toptıñ müşesi retinde tanıstırdı jäne «azuı tisi jetilgen arıstan» dep bağaladı. Videoda Hamza Kabul, Bağdad jäne Gazadağı «äl-Kaida» sodırların AQŞ, Wlıbritaniya, Franciya jäne Izrail'ge terrorlıq şabuıl jasauğa şaqırğan. Sonımen birge, saud arabiyalıq jastardı da top qatarına şaqırıp, el biligin qwlatuğa ügittegen. Atalğan terrorlıq wyımğa Saud Arabiya jastarı köbirek qatısqanı mälim.

Britaniya lauazımdıları Hamzanı terrorlıq top jetekşisiniñ mwrageri retinde qaraydı. Köptegen sarapşılar da bolaşaqta «äl-Kaidanıñ» jetekşiligi Hamza bin Ladenniñ qolında boladı dep boljaydı. Hamza öziniñ jäne äkesiniñ top işindegi, älemdegi jihadşılar arasındağı bedelinen paydalanıp «äl-Kaidanı» qayta küşeytui mümkin dep boljanuda.

“The Qazaq Times”