اتامقۇلوۆ قازاقستاننىڭ قاۋىپسىزدىك كەڭەستەگى جۇمىسىن قورىتىندىلادى

بۇگىن تۇستەن بۇرىن قر ءسىم باسشىسى ب. اتامقۇلوۆ پارلامەنت ءماجىلىسىنىڭ ۇكىمەت ساعاتىندا قازاقستاننىڭ بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندەگى 2 جىلدىق قىزمەتىنەن قورىتىندى بايانداماسىن جاسادى.

قازاقستاننىڭ بۇۇ قك-دەگى تۇراقتى ەمەس مۇشەلىگى 2017 جىلى 1 قاڭتاردا باستالىپ، 2018 جىلدىڭ 31 جەلتوقسانىندا اياقتالعان بولاتىن.

پارلامەنت ماجىلىسىندە ەسەپ بەرگەن سىرتقى ىستەر ءمينيسترى بەيبىت اتامقۇلوۆ سوزىندە: «قازاقستان ءوز ميسسياسىن ابرويمەن ورىندادى دەپ نىق سەنىممەن ايتا الامىن»، – دەدى. ول جانە قازاقستاننىڭ ۇستانىمى حالىقارالىق قاۋىمداستىق جاعىنان جوعارى باعالانعانىن، سونداي-اق، قر پرەزيدەنتى جۇكتەگەن 7 ءتۇرلى باسىمدىقتى تولىق جۇزەگە اسىرعاندارىن ايتتى.

ب. اتامقۇلوۆ قورىتىندى بايانداماسىندا قازاقستاننىڭ بۇۇ قاۋىپسىزدىك كەڭەسىندە اتقارعان قىزمەتتەرى، جەتكەن جەتىستىكتەرىنىڭ ءبارى دە ن.نازارباەۆتىڭ العا قويعان تاپسىرمالارىمەن تولىق سايكەس ەكەنىن كوبىرەك ءسوز ەتكەن.

ارينە، ەلىمىز بۇۇ قاۋىپسىزدىك كەڭەسىنە تۇراقتى ەمەس مۇشەسى بولىپ تۇرعان كەزەڭىندە قر ءسىم باسشىلىق قىزمەتىن ق. ءابدىراحمانوۆ وتەپ تۇرعان بولاتىن. قاۋىپسىزدىك كەڭەستىڭ تۇراقتى ەمەس مۇشەلىگى ەل رەتىندە قازاقستاننىڭ حالىقارالىق بەدەلى مەن ورىنى ءۇشىن ايتارلىقتاي ماڭىزدى بولعان. كەي تاۋەلسىز ساراپشىلاردىڭ پىكىرىنە سەنسەك، وسى ەكى جىل ىشىندە ۇكىمەتىمىز بۇل مۇمكىندىكتى تولىق پايدالانا المادى. ايتالىق، قىتايداعى قازاق ماسەلەسى، ورتا ازيا جانە ورتا شىعىس قاۋىپسىزدىگى ماسەلەلەرىندە بۇداندا ەلەۋلى جەتىستىكتەرگە جەتۋگە مۇمكىندىكتەر بار ەدى دەپ قارايدى.

دەگەنمەن، قازاقستان رەسپۋبليكاسى اتالمىش مۇشەلىكتە «يادرولىق قارۋسىز الەم» باستاماسىمەن كوبىرەك ەستە قالعانى انىق. بۇل جانە ن. نازارباەۆ كوتەرگەن «ۋران بانكى» سىندى جوبالارعا دا جاردەم بەرگەنى انىق.

“The Qazaq Times”