فوتو: https://assets.orf.at

اۋستريا بيلىگى «سولتۇستىك اعىس – 2» جوباسىنىڭ جۇزەگە اسۋىنا قارسى ەمەس. بۇل تۋرالى اۋستريا كانتسلەرى سەباستيان كۋرتس مالىمدەدى. 

سەباستيان كۋرتس اقش پرەزيدەنتى دونالد ترامپپەن كەزدەسۋ بارىسىندا ەۋروپا قاراماعىنداعى «سولتۇستىك اعىس – 2» گاز قۇبىرىنىڭ سالۋىنا قارسىلىق بىلدىرمەيتىنىن ايتقان. سەبەبى، شەنگەن ايماعىنا قاراستى مەملەكەتتەر ەنەرگياعا مۇقتاج. ال رەسەيدەن تاسىمالداناتىن گاز اقش-قا قاراعاندا ارزان.

جالپى العاندا اقش، ۋكراينا جانە ورتالىق ەۋروپا ەلدەرى قۇبىر قۇرىلىسىنىڭ جالعاسۋىنا قارسى، ويتكەنى بۇل ءوز اۋماعى ارقىلى رەسەي گازىنىڭ ءترانزيتى ءۇشىن سالىق الا المايتىن ۋكرايناعا كوپ كولەمدە زيان كەلتىرەدى. ۋاشينگتون بۇل گاز قۇبىرى الداعى ون جىلدىقتاردا گەرمانيانىڭ رەسەيگە ەنەرگەتيكالىق تاۋەلدىلىگىن ارتتىرادى دەپ سانايدى.

ايتا كەتەيىك، رەسەيلىك «گازپروم» «سولتۇستىك اعىس – 2» كونسورتسيۋمىن باسقارادى. 11 ملرد دوللار بولاتىن قۇرىلىس كەلەسى جىلى اياقتالۋى كەرەك. قۇبىر جۇمىستارى رەسەي گازىنىڭ گەرمانياعا ۋكراينا اۋماعىن اينالىپ ءوتۋ كولەمىن ەكى ەسە ارتتىرۋ ماقساتىندا قولعا الىنعان.

"The Qazaq Times"