تۇركيا باسشىسى رەجەپ تايىپ ەردوعان مەن اقش پرەزيدەنتى دونالد ترامپ ءسۇريا ماسەلەسىن تالقىلادى.

اقپان ايىنىڭ 21-ءى كۇنى ەردوعان مەن ترامپ تەدەفون ارقىلى سويلەسىپ، ءسۇريا ماسەلەسى مەن ايماقتان اقش اسكەرىن شىعارۋ جونىندە پىكىر الماسقان. كەلىسسوز بارىسىندا قوس تاراپ ءسۇريا ماسەلەسىن بىرلەسىپ شەشۋگە جانە ايماقتان اقش اسكەرىن شىعارۋ بارىسىندا ەكى جاقتىڭ دا مۇددەسى ەسكەرىلۋى كەرەكتىگىن ايتىپ، اتالمىش باعىتتا تىزە قوسىپ قيمىلداۋعا ۋاعدالاسقان.

بۇدان بولەك تۇركيا باسشىسى الداعى ۋاقىتتا ۋاشينگتونمەن بىرلەسىپ جۇمىس ىستەۋگە دايىن ەكەندىگىن ايتقان. ال ءوز كەزەگىندە اقش پرەزيدەنتى ەكى ەل اراسىنداعى تاۋار اينالىمىن 75 ميلليارد دوللارعا جەتكىزۋ جوسپارىندا بار ەكەندىگىن جەتكىزگەن.

بۇعان دەيىن رەجەپ تايىپ ەردوعان «اقش پرەزيدەنتى ءسۇريادان اسكەرىن شىعارۋ ارقىلى ءوز ۋادەسىندە تۇرادى دەپ ۇمىتتەنەمىن» - دەپ مالىمدەگەن. وسىدان كەيىن اقش قارۋلى كۇشتەرىنىڭ ورتالىق باسقارماسىنىڭ  باسشىسى جوزەف ۆوتەل «قازىر پەنتاگون ءسۇريادان اسكەري تەحنيكالارىن شىعارۋدا. بۇل بىرنەشە اپتا ۋاقىت الۋى مۇمكىن» - دەگەن.

"The Qazaq Times"