تاجىكستاندا قىتايدىڭ قۇپيا اسكەري بازاسى بار

تاجىكستاننىڭ تاۋلى-باداحشان اۆتونوميالىق وبلىسى، مۋرگاب اۋدانىندا قىتايدىڭ اسكەري بازاسى بار. قۇپيا بازا ءۇش جىلدان بەرى جۇمىس ىستەپ كەلەدى.

«The Washington Post» گازەتى تاجىكستاننىڭ قىتايمەن شەكارالاس اۋماعىندا اسكەري بازا بار ەكەنىن جازادى. بىراق مۇنى نە دۋشانبە، نە بەيجىڭ رەسمي تۇردە حابارلاعان ەمەس. «قىتاي اسكەري بازاسى مۋرگاب اۋدانىندا، اۋعان شەكارا بەكەتىنە جاقىن ماڭدا ورنالاسقان» دەيدى ماقالا اۆتورى گارري شيح. ول بۇل اسكەري بازاعا بارىپ، كوزىمەن كورگەن.

گارري شيح مۋرگاب بازارىندا قىتايلىق ساربازداردى كەزدەستىرگەنىن جازادى. ما ەسىمدى سارباز «The Washington Post» جۋرناليسىنە ءۇش-ءتورت جىلدان بەرى تاجىك اۋماعىندا تۇرىپ جاتقانىن ايتقان. اۆتوردىڭ سوزىنشە، قىتايلىقتار شىڭجاڭ-ۇيعىر اۆتونوميالىق اۋدانداعى اسكەريلەرگە ارنالعان فورمانى كيىپ العان.

امەريكالىق جۋرناليست اسكەري بازا اۋماعىندا قىتايدىڭ جانە تاجىكستاننىڭ مەملەكەتتىك رامىزدەرى ءىلۋلى تۇرعانىن باياندايدى. «The Washington Post» سپۋتنيك ارقىلى تۇسىرىلگەن سۋرەتتى جاريالاعان. وندا كازارما مەن وقۋ الاڭى كورىنەدى.

اسكەري بازا ورنالاسقان جەر ستراتەگيالىق ايماق. وندا ءۇش ەلدىڭ شەكاراسى (تاجىكستان، قىتاي جانە اۋعانستان) ورنالاسقان. ونىڭ جانىندا اۋعانستانعا تيەسىلى ۆاحان ءدالىزى بار. بۇل ايماق اۋعان تارابىنان مۇلدەم كۇزەتىلمەيدى.

«​The Washington Post» باسىلىمىنا تاجىكستاننىڭ سىرتقى ىستەر مينيسترلىگى مەن قىتايدىڭ اسكەري مەكەمەسى بۇل ماسەلەگە قاتىستى تۇسىنىكتەمە بەرۋدەن باس تارتقان. تاجىكستاننىڭ ءسىم رەسمي گازەت ارقىلى «ەلدە ەشقانداي قىتاي اسكەري بازاسى جوق ءارى بۇل ەشقاشان تالقىلانعان ەمەس» دەپ مالىمدەمە تاراتقان.

بىلتىر جازدا قىتاي اۋعانستاننىڭ باداحشان پروۆينتسياسىندا تەرروريزممەن كۇرەس ىنتىماقتاستىعى اياسىندا اسكەري-جاتتىعۋ بازاسىن سالعان. بۇل جونىندە «South China Morning Post» گازەتى حابارلاعان.

"The Qazaq Times"