جاپونيا گۋايدوعا قولداۋ ءبىلدىردى

جاپونيا بيلىگى ۆەنەسۋەلا وپپوزيتسيونەرى حۋان گۋايدوعا قولداۋ ءبىلدىرىپ، ەلدىڭ لەگيتيمدى باسشىسى رەتىندە تانىدى. جاپونيا ءسىم تارو كونو NHK ارناسىندا وسىنداي مالىمدەمە جاسادى.

توكيودا وتكەن ءباسپاسوز كونفەرەنتسياسىندا تارو كونو ۆەنەسۋەلا حالقى ديكتاتورلىق ساياساتتان زارداپ شەگىپ وتىرعانىن جانە الداعى ۋاقىتتا وپپوزيتسيا وكىلدەرى بيلىك ەتۋى ءتيىس ەكەندىگىن ايتىپ ءوتتى. تارو كونو: «جاپونيا ءبىر اۋىزدان  گۋايدو بيلىگىنە قولداۋ بىلدىرەدى. وكىنىشكە وراي، ۆەنەسۋەلادا ءالى كۇنگە دەيىن پرەزيدەنتتىك سايلاۋ بولعان جوق. بىراق، قاي مەملەكەتتە بولماسىن، ءادىل باسشى بيلىك ەتىپ، دەموكراتيا ورناۋى ءتيىس».

23 قاڭتاردا ءوزىن ۋاقىتشا ۇكىمەت پرەزيدەنتى دەپ جاريالاعان گۋايدونى لەگيتيمدى مەملەكەت باسشىسى رەتىندە اقش، كانادا، برازيليا، چيلي، ارگەنتينا، كولۋمبيا، كوستا-ريكا، گۆاتەمالا، گوندۋراس، پاناما، پاراگۆاي جانە پەرۋ ەلدەرى مويىندادى. وسىعان دەيىن اقش «ديكتاتور باسقارۋشى» اتانعان نيكولاس مادۋروعا قارسى سانكتسيالار جاريالاپ، مەملەكەت باسشىسى اۆتوريتارلىق ديكتاتۋراعا ۇمتىلۋدان باس تارتپايىنشا، امەريكانىڭ ەكونوميكالىق جانە ديپلوماتيالىق كۇشتەرىن تۇگەل ۆەنەسۋەلا حالقىنىڭ دەموكراتيا ورناتۋ جولىنداعى كۇرەسىنە كومەككە ارنايتىنىن حابارلاعان بولاتىن. دونالد ترامپتىڭ قاجەت بولعان جاعدايدا ۆەنەسۋەلاعا اسكەري ينتەرۆەنتسيا جاسايتىنى تۋرالى مالىمدەمەسىنىڭ سالدارىن جويۋعا نيەتتەنگەن مايك پەنس لاتىن امەريكاسى ەلدەرىنە ساپارى بارىسىندا كاراكاسقا ەكونوميكالىق قىسىم ارقىلى دا اسەر ەتۋگە بولاتىنىن ايتقان. ال قىتاي مەن رەسەي تاراپى قازىرگى باسشى نيكولاس مادۋرو ۇكىمەتىنە سەنىم ءبىلدىرىپ، بيلىككە وزگە مەملەكەتتەردىڭ ارالاسۋىن «حالىقارالىق قۇقىقبۇزۋشىلىق» دەپ اتادى.

"The Qazaq Times"