ناتو ەلدەرى رەسەيدەن تونەتىن قاۋىپ-قاتەردى تالقىلادى

ناتو ەلدەرىنىڭ قورعانىس مينيسترلەرى رەسەيدەن تونەتىن قاۋىپ-قاتەردى تالقىلادى.

Reuters اگەنتتىگىنىڭ حابارلاۋىنشا، بريۋسسەلدە وتكەن جيىن بارىسىندا رەسەيدىڭ ورتا جانە قىسقا قاشىقتىققا ارنالعان زىمىراندار تۋرالى كەلىسىمنەن شىققاننان كەيىن الەمگە تونەتىن زيان جاقتارى جانە وزگە دە ماسەلەلەر تالقىلانعان. بۇعان قاتىستى ناتو باس حاتشىسى يەنس ستولتەنبەرگ رەسەيدىڭ وسى ۋاقىتقا دەيىن كەلىسىمگە قايشى ارەكەتتەر جاساپ، حالىقارالىق زاڭدى بۇزعانىن ايتتى. سونداي-اق، زىمىران كەلىسىمى ءوز كۇشىن جويعاننان كەيىن، وزگە مەملەكەتتەرگە قاۋىپ تونەدى. وسى ماسەلەنى شەشۋ ماقساتىندا الداعى ۋاقىتتا جاڭا كەلىسىم جوباسى قاراستىرىلماق.

24 قازاندا ناتو باس حاتشىسى يەنس ستولتەنبەرگ اقش-تىڭ رەسەيمەن اراداعى زىمىران كەلىسىمىنەن شىعۋىنا قاتىستى پىكىر بىلدىرگەن بولاتىن. ول وندا: «رەسەي زىمىران كەلىسىمىندەگى وزىنە جۇكتەلگەن مىندەتتەردى ورىنداماي وتىر. ال اقش كەرسىنشە، كەلىسىم نەگىزىندە جۇمىس ىستەۋدە. بىراق كەلىسىم ورىندالۋ ءۇشىن بۇل جەتكىلىكسىز. ناتو جاڭا قارۋلانۋ جارىسى بولعانىن قالامايدى. اليانس مۇشەلەرى الداعى ۋاقىتتا اقش-تىڭ كەلىسىمنەن شىعۋ شەشىمىن تالقىلايتىن بولادى»، – دەپ مالىمدەدى.

ايتا كەتەيىك، اقش پەن رەسەي اراسىنداعى زىمىران كەلىسىمىنە 1987 جىلى قول قويىلعان. كەلىسىم بويىنشا، قوس تاراپقا 500 جانە 5,5 مىڭ شاقىرىم قاشىقتىققا ۇشاتىن بالليستيكالىق زىمىرانداردى جاساۋعا تىيىم سالىنعان. ماسكەۋ دە، ۋاشينگتون دا وسى ۋاقىتقا دەيىن ءبىر-ءبىرىن زىمىران كەلىسىمىن بۇزدى دەپ بىرنەشە رەت ايىپتاعان. 

"The Qazaq Times"