قىتاي ەكونوميكاسى قۇلدىراپ بارا جاتىر

بيىلدان باستاپ قىتاي ەكونوميكاسى الدەقايدا قۇلدىرايدى. بۇل تۋرالى Reuters اگەنتتىگى حابارلادى.
Morgan Stanley امەريكالىق بانك حولدينگىنىڭ مالىمەتىنشە، قىتايداعى جالپى ىشكى ءونىم كورسەتكىشى ەكىنشى توقساندا باسەڭدەيدى. سونىمەن قاتار، ەلدىڭ سىرتقى جانە ىشكى نارىقتاعى قارجىسى تۇراقتالماي تۇرعاندىقتان، بانكتەر ارقىلى كەلەدى دەگەن قىرۋار قاراجاتتىڭ ەسەبى تەرىس كورسەتكىشكە جەتكەن. رەسمي ستاتيستيكالىق مالىمەتتەرىنە قاراعاندا، قاراشادا ساتۋ مولشەرى 8,1%-عا وسكەن. ال بۇل 2003 جىلدان بەرگى ەڭ تومەنگى ءوسىم كورسەتكىش.

شىنتۋايتىنا كەلگەندە، قىتايدىڭ قازىرگى تاپ بولىپ وتىرعان باستى پروبلەماسى اقش-پەن ساۋدا سوعىسى عانا ەمەس. الداعى كۇندەرى قحر قۇراما شتاتتارىمەن ورتاق ساۋدا كەلىسىمىنە كەلسە دە، تۇرمىستىق بورىشتاردىڭ ارتۋى مەن جىلجىمايتىن مۇلىك نارىعىنىڭ قۇلدىراۋى ەلدەگى ىشكى سۇرانىستىڭ ازايۋىنا اسەر ەتەدى. ەكونوميستەردىڭ ايتۋىنشا، قىتايدا بيىل 6,5% بولعان ءجىو 2019 جىلى 6,1%-عا ازايادى. ياعني ەكونوميكانىڭ ءوسۋ قارقىنى جىل وتكەن سايىن قۇلدىرايدى.

ءار التى اي سايىن اقش قازىنا دەپارتامەنتى ءوزىنىڭ ەڭ نەگىزگى ساۋدا سەرىكتەرىنە «الەمدىك ەكونوميكا جانە ۆاليۋتا باعامى ساياساتى تۋرالى ەسەپ» بەرىپ، كونگرەسكە ۇسىنادى. 2018 جىلعى ساۋىردەگى ەسەپ بويىنشا، قىتاي ۆاليۋتالىق مانيپۋلياتسيالار تىزىمىنە ەنگىزىلگەن جوق. سول سەبەپتى، قازىنا دەپارتامەنتى قىتاي ۇكىمەتىن ناقتى شارالار قابىلداۋعا شاقىرعان. ايتالىق، اقش ونىمدەرى مەن قىزمەت وتەۋىن اشىق نارىققا شىعارۋ، مەملەكەت تارابىنان ارالاسۋدى قىسقارتۋ، شەتەلدىك كاسىپورىندارعا نارىقتا ۇلكەن ءرول الۋىنا جول بەرۋ، تىڭشىلىق ارەكەت ءۇشىن پايدالانىلاتىن قۇرىلعىلاردى تاراتپاۋ جانە تاعى باسقا.

بىلتىر  اقش پەن قىتاي باسشىلارىنىڭ ارگەنتينادا وتكەن كەزدەسۋىنەن سوڭ، قوس تاراپ ساۋدا سوعىسىن كەلىسسوز ارقىلى شەشۋگە كەلىسكەن بولاتىن. دەگەنمەن، كەلىسسوز مەرزىمى شەكتەۋلى. تاراپتار 1 ناۋرىزعا دەيىن ەكىجاقتى ءتيىمدى كەلىسىمگە كەلۋى كەرەك. ولاي بولماعاندا قوسىمشا كەدەندىك سالىقتار ىسكە قوسىلادى.

"The Qazaq Times"