يسپانيادا كاتالونيامەن كەلىسسوزگە قاتىستى نارازىلىق شەرۋى ءوتتى

يسپانيادا ورتالىق بيلىكتىڭ كاتالونيا ايماعى ۇكىمەتىمەن كەلىسسوز جۇرگىزۋىنە قارسى نارازىلىق شەرۋى ءوتتى.

Reuters اگەنتتىگىنىڭ حابارلاۋىنشا، شەرۋدى كونسەرۆاتيۆتىك «ۇلتتىق پارتيا»، اسىرە وڭشىل «ۆوكس»، ورتالىقشىل «ازاماتتار» پارتياسى ۇيىمداستىرعان. مادريدتە وتكەن نارازىلىق شەرۋىنە جالپى سانى 45 مىڭعا جۋىق ادام قاتىستى. ورتالىقشىل «ازاماتتار» پارتياسىنىڭ (Ciudadanos) مۇشەلەرى ەلدىڭ پرەمەر-ءمينيسترى پەدرو سانچەستىڭ سەپاراتيستەرمەن كەلىسسوزدەر جۇرگىزۋ ءۇشىن دەلدال تاعايىنداۋ جوسپارى وتانعا وپاسىزدىق جاساۋمەن تەڭ دەيدى. سەپاراتيستەر سانچەستىڭ بيلىكتەن كەتۋىن جانە مەرزىمنەن تىس جالپىۇلتتىق سايلاۋ وتكىزۋدى تالاپ ەتتى.
نارازىلىق بىلدىرۋشىلەردىڭ ءبىرى مەيبل كامپۋزانو: «ءبىز، جالپى يسپاندىقتار، سانچەستى ۇكىمەت باسشىسى بولۋعا لايىق دەپ ەسەپتەمەيمىز!»، – دەيدى. ال «حالىق» پارتياسىنىڭ كوشباسشىسى پابلو كاسادو سانچەس ساياساتىن سوتسياليستىك كاپيتالداندىرۋ جانە جالعان مامىلە دەپ ايىپتادى.

2017 جىلى قازاندا كاتالونيا بيلىگى رەسمي ءمادريدتىڭ كەلىسىمىنسىز تاۋەلسىزدىك الۋعا بايلانىستى رەفەرەندۋم وتكىزگەن بولاتىن. وسىدان كەيىن يسپانيا بيلىگى كاتالونياعا پوليتسيا مەن ۇلتتىق گۆارديا ساربازدارىن كىرگىزگەن. كەيىننەن رەسمي مادريد پەن كاتالونيا بيلىگىنىڭ بۇل ىستەرىن ەۋروپارلامەنت قاتاڭ سىنعا الىپ، ەكى جاقتى كەلىسىمگە كەلۋگە شاقىردى. جالپى العاندا كاتالونياداعى رەفەرەندۋم جەرگىلىكتى حالىقتى ەكىگە ءبولدى. اۆتونوميا بولىپ قالۋدى ءجون كورەتىندەر مەن يسپانيادان ىرگەسىن اۋلاق سالۋدى قالايتىندار اراسىنداعى داۋدىڭ نەگىزگى تاقىرىبى – كاتالونيانىڭ ەكونوميكالىق مۇمكىندىكتەردى پايدالانا المايتىندىعى. قوعام بەلسەندىلەرى سەپاراتيستىك قوزعالىستىڭ جەڭىسكە جەتۋى ءۇشىن بىرنەشە جولدار بارىن ايتادى. سولاردىڭ ءبىرى – ازاماتتاردىڭ جاڭا بيلىككە مويىنسۇنباۋى جانە ازاماتتىق قوعامدى ىسكە اسىرۋ.

وسى شەرۋگە قاتىستى جەرگىلىكتى سايلاۋ جينالىسىندا ءسوز سويلەگەن پەدرو سانچەس ونىڭ سوتسياليستىك پارتياسى ارقاشان ادىلەت جاعىندا بولعانىن جانە شيەلەنىسكەن داعدارىستى شەشۋگە تىرىساتىنىن ايتتى. ەندى سارسەنبىدە ۇكىمەت 2019 جىلعا ۇسىنىلعان بيۋدجەت بويىنشا داۋىس بەرۋدى جۇرگىزۋى ءتيىس: ەگەر ول بەكىتىلمەسە، يسپانيادا مەرزىمىنەن بۇرىن سايلاۋ وتەدى.

"The Qazاq Times"