«وزبەككونتسەرت» باسشىسى انشىلەردى پرەزيدەنتتى ماقتاپ ءان ايتپاۋعا شاقىردى.

«وزبەككونتسەرت» باسشىسى وديل ابدۋكاححاروۆ ەسترادا جۇلدىزدارىن پرەزيدەنتتى ماقتايتىن اندەردى شىعارماۋعا جانە ايتپاۋعا ششاقىردى. ونىڭ سوزىنشە، پرەزيدەنت شاۆكات ميرزيەەۆكە ەشقانداي جارنامانىڭ قاجەتى جوق.

«پرەزيدەنتتىڭ ءوزى ايتقان: «بۇدان بىلاي ماقتاۋدىڭ قاجەتى جوق» دەپ. ءبىز بۇگىن ءۇنسىز قالساق، ەرتەڭ جاھانگەر پازىلجونوۆ پرەزيدەنتكە ۇنايمىن دەپ ەكىنشى، ءۇشىنشى اندەرىن شىعارادى. وسىدان كەيىن «تىرناق استىنان كىر ىزدەيتىن» ءبىزدىڭ شەتەلدەگى جۋرناليستەرىمىز «بيلىك پرەزيدەنتتى ماقتاتىپ ءان شىعارتۋدا» دەگەن سارىنداعى ماقالالار جازادى. بۇنىڭ بىزگە قاجەتى قانشا؟» -دەپ مالىمدەدى ابدۋكاححاروۆ.

بۇعان دەيىن الەۋمەتتىك جەلىلەردە «بوجالار» توبىنىڭ ءانشىسى جاھانگەر پازىلجونوۆتىڭ «پرەزيدەنتپەن سەلفي» ءانى قاتاڭ سىنعا ۇشىراعان. وسىدان كەيىن وزبەكستان مادەنيەت مينيسترلىگىنىڭ ءباسپاسوز حاتشىسى ماۆليۋدا اسقارحودجاەۆا «پرەزيدەنتپەن سەلفي» ءانىنىڭ بەينەبايانى تەلەارنالاردان «وزبەككونتسەرت» كوركەمدىك كەڭەسىنىڭ رۇقساتىنسىز كورسەتىلىپ جاتقاندىعىن ايتقان.

"The Qazaq Times"