بريتانيانىڭ ىشكى ىستەر مينيسترلىگى جاساعان مالىمدەمەدە، 6 جىل بۇرىن وزدەرىن «يسلام مەملەكەتى» دەپ اتاعان تەررورلىق ۇيىم جاعىنان بارىمتالانعان بريتاندىق جۋرناليست ءتىرى بولۋى مۇمكىن دەپ حابارلاندى. بۇنداي مالىمدەمەنى بريتانيا ىشكى ىستەر ءمينيسترىنىڭ ورىنباسارى بەن ۋوللەس جاساعان بولادى.

2012 جىلى ءسۇريادا تىلشىلىك ساپارمەن جۇرگەن بريتاندىق فوتو ءتىلشى جون كەتلي تەررورلىق توپ جاعىنان بارىمتالانعان. كەيىن «ەركىن ءسۇريا ارمياسىنىڭ» كومەگىندە قارۋلىلاردىڭ قولىنان ءبىر رەت قاشىپ شاعادى، الايدا، سول جىلدىڭ سوڭىندا سۇرياعا ەكىنشى رەت جاساعان ساپارىندا قايتالاي تۇتقىنعا تۇسكەن. 4 جىلدان كەيىن «يسلام مەملەكەتى» ۇيىمى  كەتليدى تۇسىرگەن ۆيدەونى ينتەرنەتكە جاريالاعان. ۆيدەودا ول ءوزىن «يسلام مەملەكەتى» ۇيىمنىڭ قولىنداعى سوڭعى تۇتقىن ەكەنىن ايتقان.

ونىڭ ءتىرى ەكەندىگى تۋرالى حابار باتىس ەلدەرىنە توسىن جاڭالىق بولدى. 2017 جىلى يراك ارمياسى موسۋل قالاسىن قايتارىپ العاننان كەيىن، جۋرناليست كەتليدىڭ قازا تاپقانى تۋرالى حابار تاراعان.

فرانتسيانىڭ Paris Match اتتى باسىلىمى جۋرناليست كەتليدىڭ ءتىرى ەكەنى تۋرالى العاش مالىمەت تاراتتى. اتالعان باسىلىم بۇل مالىمەتتە «يم» توبىنىڭ مۇشەسىنەن العان. قارۋلى توپتىڭ اتى-ءجونىن بىلدىرگىسى كەلمەگەن ءبىر مۇشەسى وسىدان 7-8 اي بۇرىن بريتاندىق ءجۋرناليستى كورگەنىن، ونىڭ «يسلام مەملەكەتى» ۇيىمىنا قىزمەت ىستەپ جۇرگەنىن ايتقان.

ونىڭ ءتىرى ەكەنى تۋرالى حاباردى بيىل جىل باسىندا سۇرياداعى وپپوزيتسيا كۇشتەرى دە ايتقان. ولار جۋرناليست كەتلي ءسۇريانىڭ وڭتۇستىك-شىعىسىنداعى حاجين قالاسىندا جۇرگەن بولۋى مۇمكىن دەپ بولجاعان.

وسى اقپاراتتاردان كەيىن جون كەتليدىڭ ءتىرى بولۋى مۇمكىن ەكەنىن بريتانيانىڭ ءىىم-ءى دە رەسمي حابارلادى. باتىس اقپارات قۇرالدارىن وسىعان دەيىن ءجۋرناليستىڭ تەررورلىق توپتا قانداي جۇمىس اتقارعانىن، ەگەر ونى بريتانياعا قايتارعان جاعدايدا «يسلام مەملەكەتى» ۇيىمنىڭ جۇرتقا بەيمالىم سىرلارى اشىلۋى مۇمكىن دەگەن ماسەلەلەر كوبىرەك قىزىقتىرۋدا.

“The Qazaq Times”