باس قالا باسپانا ماسەلەسىنە ەندى كوڭىل بولە باستاعان سىڭايلى

باس قالا باسپانا ماسەلەسىنە ەندى كوڭىل بولە باستاعانداي. قازىرگى تاڭدا كوپ بالالى وتباسىلاردى ۇيمەن قامتاماسىز ەتۋ ءۇشىن جاڭا قۇرىلىسقا قارجى ىزدەي باستاعان. بۇل تۋرالى يندۋستريا جانە ينفراسترۋكتۋرانى دامىتۋ ءمينيسترى جەڭىس قاسىمبەك مالىمدەدى.

«بۇل ۇلكەن تراگەديا. قيىن، ءارى وتە اۋىر سۇراق. «نۇرلى جەر» باعدارلاماسىنىڭ باستى  ماقساتى حالىققا قول جەتىمدى پاتەرلەر مەن ۇيلەردى ۇسىنۋ. سونىمەن بىرگە، كوپبالالى وتباسىلارعا باسپانا بەرۋ. بيىل ءبىز جىل سايىنعى باسپانا قۇرىلىسىنا بولىنەتىن قارجىنى 25 ميلليارد تەنگەدەن، 35 ميللياردقا ءوسىردى. وسىنىڭ ارقاسىندا 4 مىڭ جالعا الىناتىن پاتەر تۇرعىزىلماق. ونىڭ ىشىندە كوپبالالى وتباسىلار دا بار»، دەدى مينيستر جەڭىس قاسىمبەك.

سونىمەن قاتار، جالعا بەرىلەتىن ۇيلەردى تاعى دا كوبەيتۋ ءۇشىن  قوسىمشا قارجى تاقىرىبىن ۇكىمەت باسشىسىنىڭ ورىنباسارى ەربولات دوساەۆپەن تالقىلايتىندىعىن جەتكىزدى.

جەرگىلىكتى بيلىك ورىندارىنىڭ اقپاراتى بويىنشا، قازىرگى تاڭدا 28 مىڭ وتباسى باسپانا كەزەگىن كۇتۋدە. ولاردىڭ قونىس تويىن قاشان تويلايتىندىعى دا بەلگىسىز.

ەستەرىڭىزگە سالا كەتەيىك، 4 اقپان كۇنى استانا قالاسىنداعى كوكتال اۋدانىندا ورنالاسقان جالدامالى پاتەردەن ءورت شىعىپ، 5 ءبۇلدىرشىن قازا تاپقان بولاتىن. اتا-اناسى جۇمىسقا كەتىپ، قاراۋسىز قالعان بالالاردى قىزىل جالىننان اراشالاپ قالۋ مۇمكىن بولمادى. 5 بالانى اسىراۋ ءۇشىن ءۇش ايلىق نارەستەسىن تاستاپ جۇمىسقا شىققان اتا-انا بار بولعانى 40 مينۋتتىڭ ىشىندە 5 بالاپانىنان ايىرىلدى.

سونىمەن قاتار، مەملەكەتتەن بولىنەتىن 16000 تەڭگە جاردەماقىنى كوپ دەگەن مينيستر مادينا ابىلقاسىموۆا ءالى كۇنگە دەيىن اشىق مالىمدەمە جاساماي وتىر. ال، مەرزىمدى دەكرەتكە شىققان انالاردىڭ قۋ تىرلىككە ەرتە ارالاسۋى «وزدەرىنىڭ تاڭداۋى» دەگەن سۆەتلانا جاقىپوۆانىڭ ءسوزى قازىر قالىڭ جۇرتتىڭ اشۋىنا تيگەندىگى بەلگىلى.

وقيعادان كەيىن قيمىلدايتىن ءبىزدىڭ بيلىكتەگىلەر، قانشاما جاعدايلار بولعانىمەن، ءالى كۇنگە دەيىن دەر كەزىندە مالىمدە جاساپ، قايعىدان بۇرىن كومەكتەرىن سوزۋعا اسىعار ەمەس.  شىرىلداعان حالىقتىڭ داۋىسىنان وياناتىندار، قاشان ءوز بەتىمەن جۇمىس ىستەيتىندىگى بۇلىڭعىر بولاشاقتىڭ ەنشىسىندە.

"The Qazaq Times"