ۇلىبريتانيا ءسىم رەسەيدى ايىپتادى

ۇلىبريتانيا سىرتقى ىستەر ءمينيسترىنىڭ ورىنباسارى مارك فيلد قاۋىمدار پالاتاسىندا رەسەي ورتاشا جانە از قاشىقتىقتاعى زىمىرانداردى جويۋ تۋرالى شارتتىڭ بۇزىلۋىنا باستى سەبەپكەر دەپ ايىپتادى.

Times مالىمەتىنشە، بريتانيا ۇكىمەتى اقش-تىڭ حالىقارالىق كەلىسىمشارتتان شىعۋىنا قولداۋ ءبىلدىرىپ وتىر. مارك فيلد رەسەيدى شارت تالاپتارىنا قايشى كەلەتىن راكەتالاردىڭ ازىرلەنۋىنە بايلانىستى كەزدەسۋ وتكىزگەن كەزدە ءبىراز ايعاقتان جالتارىپ، وزگە مەملەكەتتەردى اقش-قا قارسى قويۋعا تىرىستى دەيدى. ءفيلدتىڭ ويىنشا، اتالعان شارت ءوز ۋاقىتىندا «الەمدەگى ستراتەگيالىق تۇراقتىلىققا ەلەۋلى ۇلەس قوستى»، بىراق ەكى تاراپ تا شارتتاردى ورىنداعان كەزدە جوعارى كورسەتكىش بولاتىن ەدى.

ۇلىبريتانيانىڭ رەسەيمەن قارىم-قاتىناستاعى سەنىم دەڭگەيى قازىر وتە تومەن، بىراق ەكى ەل ءالى دە قالىپتاسقان جاعدايدى تالقىلاماق. بريتانيا تاراپى رەسەي پرەزيدەنتىن «NOVATOR 9M729» قاناتتى زىمىراندارىن جويۋدى تالاپ ەتتى. سەبەبى، اقش-تىڭ شارتتان ۋاقىتشا شىعۋىنا باستى سەبەپ تە وسى. ال بريتانيا سىرتقى ىستەر ءمينيسترى، لەيبوريست فابيان گاميلتون رەسەي تاراپى «قاۋىپتى قارۋ-جاراقتاردى جويۋ ءۇشىن زىمىران كەلىسىمىنىڭ ورنىن باساتىن جاڭا شارت جاساۋعا مىندەتتى»، ەگەر بۇل شارت جۇزەگە اسپاسا ناتو مۇشەلەرى مەن ەو ەلدەرى اقش قابىلداعان شەشىمدەردى ءبىراۋىزدان قولدايتىنىن ايتتى. 

نەگىزىنەن اقش پەن كەڭەستەر وداعى 1987 جىلى زىمىران كەلىسىمىنە قول قويعان بولاتىن. كەلىسىم بويىنشا، قوس تاراپ 300-دەن 3400 ميل قاشىقتاققا دەيىن جەردەن ۇشىرىلاتىن بالليستيكالىق زىمىرانداردى شىعارماۋعا ۋاعدالاسقان. كەلىسىمگە سول كەزدەگى اقش پرەزيدەنتى رونالد رەيگان مەن كەڭەس وداعىنىڭ باسشىسى ميحايل گورباچەۆ قول قويعان. كەلىسىم بويىنشا، قوس تاراپقا 500 جانە 5,5 مىڭ شاقىرىم قاشىقتىققا ۇشاتىن بالليستيكالىق زىمىرانداردى جاساۋعا تىيىم سالىنعان. بىلتىر قازاندا اقش پرەزيدەنتى دونالد ترامپ رەسەيمەن اراداعى زىمىران كەلىسىمىنەن شىعاتىنىن ايتقان بولاتىن. ترامپتىڭ سوزىنشە، رەسمي ماسكەۋ اقش-پەن اراداعى زىمىران كەلىسىمىنىڭ شارتتىرىن ورىنداپ وتىرعان جوق. 

"The Qazaq Times"