تۇركيا، رەسەي جانە يران باسشىلارى سوچيدە ءسۇريا ماسەلەسىن تالقىلايدى.

Reuters اگەنتتىگىنىڭ مالىمەتىنشە، 14 اقپانعا جوسپارلانعان باسقوسۋدا ۆلاديمير پۋتين، رەجەپ تايىپ ەردوعان جانە حاسان رۋحاني ءسۇريادان امەريكالىق اسكەرلەردىڭ شىعارىلۋ پروتسەسىن جانە ايماقتاعى احۋال توڭىرەگىندە اڭگىمە وربىتەدى. تۇركيا پرەزيدەنتى رەجەپ تايىپ ەردوعاننىڭ ايتۋىنشا، اتالعان مەملەكەتتەردىڭ كوشباسشىلارى ءسۇريانىڭ بۇگىنى مەن بولاشاعىن تالقىلاپ، بىرگە كۇش بىرىكتىرمەك. وسى ۋاقىتقا دەيىن تەھران مەن ماسكەۋ ءسۇريا پرەزيدەنتى باشار اساد رەجيمىن قولداپ كەلەدى. ال اقش پەن تۇركيا اتالعان اۋماقتاعى بەيبىت تۇرعىندارعا قولداۋ كورسەتەتىنىن ايتقان.

ايتا كەتەر بولساق، بىلتىر سۇرياعا قاتىستى تورتجاقتى كەزدەسۋ وتكىزۋ تۋرالى باستامانى العاشقىلاردىڭ ءبىرى بولىپ رەجەپ تايىپ ەردوعان ۇسىنعان بولاتىن. وسى ماقساتتا قىركۇيەكتىڭ ورتاسىندا ءتورت تاراپ باس قوسىپ، حالىقارالىق ماسەلەلەردى تالقىلاعان.

"The Qazaq Times"