ۆەنەسۋەلاداعى نارازىلىق شەرۋلەرى ازاماتتىق سوعىسقا ۇلاسۋى مۇمكىن

ۆەنەسۋەلاداعى نارازىلىق شەرۋلەرى ازاماتتىق سوعىسقا ۇلاسۋى مۇمكىن.

ۆەنەسۋەلادا بىرنەشە كۇنگە جالعاسقان نارازىلىق شەرۋلەرى كەزىندە قىرىققا جۋىق ادام قازا تاپقان. بۇۇ-نىڭ ادام قۇقىقتارى جونىندەگى ءبولىمىنىڭ حابارلاۋىشا، حالىق نارازىلىعىنىڭ سوڭى جاپپاي تارتىپسىزدىككە ۇلاسقان جانە 850-دەن استام ادام قاماۋعا الىنعان. ولاردىڭ اراسىندا سەكسەنگە جۋىق بالا بار. ال قازا تاپقانداردىڭ 26-سى اتىپ تاستالعان.

بۇل جاعدايلاردان كەيىن ۆەنەسۋەلا پروكۋراتۋراسى وپپوزيتسيا جەتەكشىسى حۋان گۋايدوعا قارسى تەرگەۋ باستاپ، ونىڭ ەسەپ-شوتىن جاۋىپ تاستاعان. بىراق، اقش، كانادا، برازيليا، چيلي سىندى مەملەكەتتەر ۆەنەسۋەلا بيلىگىنە وپپوزيتسيا وكىلى وتىرۋى ءتيىس دەدى. اقش «ديكتاتور باسقارۋشى» اتانعان نيكولاس مادۋروعا قارسى سانكتسيالار جاريالاپ، مەملەكەت باسشىسى اۆتوريتارلىق ديكتاتۋراعا ۇمتىلۋدان باس تارتپايىنشا، امەريكانىڭ ەكونوميكالىق جانە ديپلوماتيالىق كۇشتەرىن تۇگەل ۆەنەسۋەلا حالقىنىڭ دەموكراتيا ورناتۋ جولىنداعى كۇرەسىنە كومەككە ارنايتىنىن حابارلاعان بولاتىن. اقش ۆيتسە-پرەزيدەنتى مايكل پەنس ۋاشينگتوندا ونىڭ سەنىمدى وكىلىمەن كەزدەسىپ، ۆەنەسۋەلا ماسەلەسىن تالقىلادى. كەي ساراپشىلاردىڭ پىكىرىنشە، ەگەر مادۋرو ءوز ەركىمەن بيلىكتەن كەتپەسە، نارازىلىق شەرۋلەرى ازاماتتىق سوعىسقا ۇلاسۋى مۇمكىن.

ايتا كەتەيىك، ۆەنەسۋەلادا پرەزيدەنت نيكولاس مادۋروعا قارسى شەرۋلەر 21 قاڭتاردا باستالعان. العاشقى شەرۋدى ەل اسكەريلەرى وتكىزدى. 23 قاڭتاردا ۇلتتىق اسسامبلەيا باسشىسى حۋان گۋايدو ءوزىن ۋاقىتشا پرەزيدەنت دەپ جاريالاپ، ەلدە سايلاۋ وتكىزەتىنىن ايتتى.

"The Qazaq Times"