كانادانىڭ قىتايداعى ەلشىسى قىزمەتىنەن كەتتى

كانادا پرەمەر-ءمينيسترى جاستين تريۋدو قىتايداعى ەلشى جون ماككاللۋمدى قىزمەتىنەن بوساتتى. بۇعان كانادالىق ەلشىنىڭ «Huawei» كومپانياسى باسشىسىنىڭ تۇتقىندالۋىنا قاتىستى پىكىرى سەبەپ بولعان.

جون ماككاللۋم ءوز سوزىندە «Huawei» كومپانياسىنىڭ قارجىلىق ديرەكتورىن بوستاندىققا جىبەرۋ ارقىلى كانادا مەن قىتاي بايلانىسىن رەتكە كەلتىرۋدىڭ ماڭىزدى ەكەندىگىن ايتقان. ال پرەمەر-مينيستر تريۋدو ەكس-ەلشىنىڭ وسى ۋاقىتقا دەيىن جوعارى دەڭگەيدە قىزمەت اتقارعانىن جانە Huawei-گە قاتىستى جاعدايدا ەشقانداي ساياسي استاردىڭ جوق ەكەندىگىن اتاپ ءوتتى. «كانادا بيلىگىنىڭ قىتايلىق كومپانيا قىزمەتكەرىن تۇتقىنعا الۋى ەشقانداي ساياسي ءمان بىلدىرمەيدى. ءبىز تەك قانا زاڭ اياسىندا جۇمىس ىستەيمىز»، – دەدى تريۋدو.

وسىعان دەيىن قىتايلىق «Huawei» كومپانياسى باسشىسىنىڭ قىزى جانە قارجى ديرەكتورى مىڭ ۆانجوۋ ۋاشينگتوننىڭ سۇراۋى بويىنشا كانادا مەملەكەتىندە تۇتقىندالعان بولاتىن. بۇل جاعدايدان سوڭ قىتاي سوتى كانادالىق روبەرت شەللەنبەرگكە «ەسىرتكى تاسىمالىمەن اينالىستى» دەگەن ايىپ تاعىپ، ءولىم جازاسىنا كەسۋ تۋرالى ۇكىم شىعاردى. ساراپشىلاردىڭ ايتۋىنشا، قىتاي بيلىگى شەللەنبەرگكە قاتاڭ شەشىم شىعارۋ ارقىلى كانادادان ءوشىن الماق.

ايتا كەتەيىك، 20 قاراشادا داليان جەرىندەگى سوت كانادا ازاماتىن 15 جىلعا باس بوستاندىعىنان ايىرۋ تۋرالى شەشىم شىعارعان. بىراق، اراعا ەكى اي سالىپ جازانى وزگەرتتى. ال روبەرت شەللەنبەرگتىڭ ءوزى قىتايعا تەك تۋريست رەتىندە بارعاندىعىن جانە وزىنە تاعىلعان ايىپتىڭ ادىلەتسىز شەشىم ەكەندىگىن ايتتى. سوت شەشىمىنەن كەيىن كانادا پرەمەر-ءمينيسترى جاستين تريۋدو بەيجىڭدى «ادام قۇقىعىن بۇزۋعا باعىتتالعان ادىلەتسىز شەشىم شىعاردى» دەپ ايىپتادى. قاماۋعا الىنعان ازاماتتىڭ وتباسى قىتايدان ناقتى دالەلدەردى تالاپ ەتىپ وتىر.

"The Qazaq Times"