ەو رەسەيگە قارسى سانكتسيا ەنگىزۋدى تالقىلايدى

ەۋروپالىق وداق كەرش بۇعازىندا ورىن العان جاعدايعا بايلانىستى رەسەيگە قارسى سانكتسيا ەنگىزۋ تالقىلايدى. بۇل تۋرالى ەۋرووداقتىڭ اقپارات كوزىنە سىلتەمە جاساپ، 20minutes.fr اگەنتتىگى حابارلادى.

اقپاندا وسى ماسەلەگە قاتىستى وداق قۇرامىنداعى ەلدەر سانكتسيالىق شارا اياسىندا جاڭا تىزىمدەر جاسايدى. رەسمي سايتتا ايتىلعانداي، كەرش بۇعازىندا بولعان جاعداي ۋكراينانىڭ تاۋەلسىزدىگى مەن ەگەمەندىگىنە، ايماقتىق تۇتاستىعىنا قاۋىپ توندىرەدى. وسى رەتتە ەۋروپا وداعىنىڭ ۋاقىتشا توراعا قىزمەتىن اتقارۋشى، اۋستريا سىرتقى ىستەر ءمينيسترى كارين كنايسل جەلتوقساندا وتەتىن سامميتتە وداق ەلدەرىنىڭ باسشىلارى ازوۆتا ۋكراينانىڭ ءۇش اسكەري كەمەسىن ەكيپاجىمەن قوسا باسىپ العانى ءۇشىن رەسەيگە سالىنعان سانكتسيالاردى قاتاڭداتۋ ماسەلەسىن قاراستىراتىنىن مالىمدەدى. بۇل ۇسىنىسقا ەستونيا، پولشا قولداۋ بىلدىرسە، گەرمانيا مەن فرانتسيا قارسى شىقتى. ەكى ەل وكىلدەرى ۋكراينا مەن رەسەي اراسىنداعى دوستىق قاتىناسىن كۇشەيتۋ كەرەكتىگىن جانە سانكتسيانىڭ بۇعان ساي كەلمەيتىنىن ايتقان. بىراق، ەو باسشىلىعى وسى ۋاقىتقا دەيىن ورىن العان جايتتاردان كەيىن وداق قۇرامىنداعى ەلدەر ماسكەۋگە قارسى سالىناتىن سانكتسيالىق رەجيمدى ءبىر اۋىزدان قولداۋى ءتيىس دەيدى. ايتا كەتەر جايت، ەگەر سانكتسيا ەنگىزۋ تۋرالى شەشىم ماقۇلدانسا، جاڭا سانكتسيالىق تىزىمگە ماسكەۋ مەن كيەۆ تەكەتىرەسىنە قاتىسى بار ادامدار ىلىگەدى.

بۇعان دەيىن ماسكەۋ مەن كيەۆ تەكەتىرەسىنە قاتىستى بۇۇ قاۋىپسىزدىك كەڭەسىنىڭ وتىرىسىندا اقش-تىڭ تۇراقتى وكىلى نيككي حەيلي رەسەيدىڭ كەزەكتى اگرەسسيالىق ارەكەتىن «قاۋىپتى ەسكالاتسيا جانە حالىقارالىق قۇقىقتىڭ بۇزىلۋى» دەپ سىنعا العان. ال مەملەكەتتىك حاتشى مايك پومپەو: «اقش رەسەيدىڭ اگرەسسيۆتى ارەكەتتەرىن ايىپتايدى. ۋكرايناعا كەمەلەردى قايتارىپ، ۇستالعان ەكيپاج مۇشەلەرىن بوساتۋدى، ۋكراينانىڭ ەگەمەندىگى مەن ونىڭ اۋماقتىق تۇتاستىعىن قۇرمەتتەۋدى رەسەيدەن تالاپ ەتەمىز»، – دەپ مالىمدەدى.

ەسكە سالا كەتەيىك، 25 قاراشادا رەسەي ارنايى جاساعى ازوۆ تەڭىزىندە ۋكراينا اسكەري تەڭىز كۇشتەرىنە تيەسىلى ءۇش بىردەي كەمەگە شابۋىل جاساپ، باسىپ العان بولاتىن. وسىدان كەيىن ۋكراينا قاۋىپسىزدىك كەڭەسىنىڭ كەزەكتەن تىس وتىرىسى ءوتىپ، ەل پرەزيدەنتى پەتر پوروشەنكو سوعىس جاعدايىن ەنگىزگەن. ەكى ەل اراسىنداعى تەكەتىرەس ناتو مەن ەو ەلدەرىن جانە اقش-تى بەي-جاي قالدىرعان جوق. ناتو رەسەيدەن ۋكراينانىڭ اۋماقتىق تۇتاستىعىنا قۇرمەتپەن قاراۋدى تالاپ ەتسە، ۋاشينگتون ماسكەۋدى «اگرەسسيالىق باعىتتاعى مەملەكەت» دەپ ايىپتادى.

"The Qazaq Times"