بايقوڭىر قالاسىنداعى كورنەكى ەسكەرتكىش. فوتو: قازاقپارات حاا

سارسەنبى كۇنى ءماجىلىس وتىرىسىندا «1994 جىلعى 10 جەلتوقسانداعى قازاقستان رەسپۋبليكاسىنىڭ ۇكىمەتى مەن رەسەي فەدەراتسياسىنىڭ ۇكىمەتى اراسىنداعى «بايقوڭىر» كەشەنىن جالعا بەرۋ شارتىنا وزگەرىس ەنگىزۋ تۋرالى حاتتامانى راتيفيكاتسيالاۋ تۋرالى» زاڭنىڭ جوباسى ماقۇلداندى. وزرەرىسكە سايكەس جالعا بەرۋ مەرزىمى 2050 جىلعا دەيىن ۇزارتىلماق. تاعى ءبىر زاڭ جوباسى نەگىزىندە رەسەيلىك زىمىران ۇشىرۋدى توقتاتۋ مەرزىمى ناقتىلاندى.

ءماجىلىستىڭ وسى وزگەرىستى ەنگىزگەن ماماندانعان كوميتەت قورىتىندىسىندا «حاتتاما بويىنشا كەلىسىمشارت مەرزىمى تۋرالى 4-باپ وزگەرىپ، ۋاقىتى 2050 جىلعا دەيىن ۇزارتىلادى» دەلىنگەن.

زاڭ جوباسىن تانىستىرعان تسيفرلىق دامۋ ءارى اەروعارىش ونەركəسىبى ءمينيسترى باعدات مۋسين قازاقستان «بايقوڭىر» عارىش ايلاعىن «1994 جىلى ەكونوميكالىق  داعدارىس كەزىندە» رەسەيگە بەرۋگە شەشىم قابىلدانعانىن ەسكە الدى.

«بايقوڭىر» كەشەنى رەسەي فەدەراتسياسىنىڭ جالعا الۋ جاعدايىندا 20 جىلدان استام جۇمىس ىستەپ كەلەدى. جالعا بەرۋ شارتىنا سايكەس «بايقوڭىر» كەشەنىن جالعا بەرۋ مەرزىمىن كەلەسى 10 جىلعا ۇزارتۋ مۇمكىندىگىمەن رەسەي فەدەراتسياسىنا 20 جىلعا جالعا بەرىلدى. بۇدان وزگە «بايقوڭىر» كەشەنىنىڭ قىزمەت ەتۋىنىڭ ءتۇرلى ماسەلەلەرىن رەتتەيتىن تاعى 70-كە جۋىق حالىقارالىق شارتقا قول قويىلدى. «بايقوڭىر» عارىش ايلاعى ساقتالىپ، ويداعىداي جۇمىس ىستەپ جاتىر. رەسپۋبليكالىق بيۋدجەتكە جىل سايىن «بايقوڭىر» كەشەنىن پايدالانعانى ءۇشىن 115 ملن اقش دوللارى كولەمىندە قارجى تۇسەدى»، – دەدى ول.

كەشەن جالعا بەرىلگەن 27 جىل ىشىندە رەسپۋبليكالىق بيۋدجەتكە شامامەن 3,1 ملرد اقش دوللارى سوماسىندا قاراجات تۇسكەن.

سونىمەن قوسا، ءماجىلىس «بايقوڭىردان» زىمىران ۇشىرۋعا قاتىستى زاڭ  جوباسىن قابىلداپ، سەناتقا جولدادى. ۇكىمەت مۇشەسى ەندى عارىش ايلاعىنان ۇشىرىلاتىن «پروتون» زىمىران تاسىعىشتار سانى قىسقارماق، وسىلايشا 2026 جىلى ءبىرجولا توقتاتىلادى دەپ سەندىردى.

«2016 جىلى رەسەيمەن جىل سايىن بەستەن ارتىق «پروتون» زىمىران تاسىعىشىن ۇشىرماۋ جونىندە كەلىسىم جاسالدى، 2026 جىلعا تامان ونى پايدالانۋدى مۇلدە توقتاتادى»، – دەدى مۋسين.

ءمينيستردىڭ ايتۋىنشا، 2020 جىلى رەسەي «پروتوندى» بايقوڭىردان ءبىر-اق رەت ۇشىرعان. ال بيىلعا زىمىران ۇشۋ جوسپارىن ازىرگە بەلگىسىز.

"The Qazaq Times"