تۇركىمەنستان 2019 جىلدىڭ 1 قاڭتارىنان باستاپ شەت ەلگە جونەلتىلەتىن كىتاپتارعا باقىلاۋدى كۇشەيتتى. ەندى شەكارادان وتكىزىلەتىن ءاربىر كىتاپ ءۇشىن اشحابادتاعى ۇلتتىق كىتاپحانادان «ۇلتتىق قۇندىلىقتار ساناتىنا جاتپايدى» دەگەن انىقتاما الۋى ءتيىس.

بۇعان دەيىن شەت ەلدەرگە 4 كىتاپقا دەيىن ارنايى رۇقساتسىز جىبەرۋ مۇمكىن بولعان. ەندى جاڭا تالاپتارمەن جۇمىس ىستەي باستاعان «تۇركىمەنپوشتا» قىزمەتى ءاربىر ازاماتتان انىقتاما سۇراپ وتىر.

سونىمەن قاتار، تۇركىمەن ۇلتتىق كىتاپحاناسىنان رۇقسات الۋ دا قيىنداي تۇسكەن. ارنايى ساراپتامادان وتكىزىلىپ 4-5 كۇننەن كەيىن عانا جاۋابى شىعادى. بىلتىرعى جىلعا دەيىن ءبىر-ەكى ساعاتتا پوشتاعا سالىپ جونەلتەتىن تۇركىمەن جۇرتشىلىعى قازىر بۇل زاڭعا شاعىمدانۋدا.

2018 جىلدىڭ قاراشا ايىندا تۇركمەننىڭ رەسمي باق وكىلدەرى قۇربانقۇل بەردىمۇحامەدوۆتىڭ كىتاپحانالاردى دامىتۋدى باستى تالاپ رەتىندە قويعاندىعىن مالىمدەگەن بولاتىن. وسىدان كەيىن تۇركىمەنستان باسشىسى ءوزىنىڭ جەكە كىتاپحاناسىنداعى وقۋ قۇرالدارىنىڭ ءبىر بولىگىن ۇلتتىق كىتاپحانالارىنا بەرگەنى دە ايتىلدى.

حالىقارالىق ساراپشىلاردىڭ پايىمداۋىنشا، عالامتوردى بۇعاتتاپ، حالىقتىڭ زامان اعىمىنا ساي ءومىر ءسۇرۋىن باياۋلاتىپ وتىرعان تۇركىمەن بيلىگى، ەندى شەت ەل اسقان ازاماتتارىنا كىتاپ جونەلتۋگە توسقاۋىل قويۋ ۇستىندە دەيدى. سونىمەن بىرگە، ءاربىر كىتاپ ءۇشىن تۇركىمەن ۇلتتىق كىتاپحاناسىنان انىقتاما الۋ ءبىر كۇنى تۇرعىنداردى دا مەزى قىلىپ جىبەرۋى ابدەن مۇمكىن دەيدى.

"The Qazaq Times"