دونالد ترامپ پەن نيكولاس مادۋرو فوتو: nv.ua

«اڭداماي سويلەگەن، اۋىرماي ولەدى دەمەكشى»، اقش پرەزيدەنتى دونالد ترامپ ۆەنەسۋەلانىڭ ۋاقىتشا پرەزيدەنتى رەتىندە حۋان گۋايدونى مويىنداعان ءۇشىن قاتتى سىنعا ۇشىراپ وتىر.

ۆەنەسۋەلانىڭ قازىرگە پرەزيدەنتى نيكولاس مادۋرو كاراكاستاعى پرەزيدەنت سارايىندا اقش پەن اراداعى بارلىق قارىم-قاتىناسقا نۇكتە قوياتىندىعىن مالىمدەدى. بۇدان بولەك، ۆەنەسۋەلا جەرىندەگى بارلىق اقش-تىڭ ديپلوماتيالىق وكىلدەرىنە شەكارادان شىعۋى ءۇشىن 72 ساعات ۋاقىت بەرىپ وتىر.

مادۋرونىڭ سوزىنە سەنسەك، اقش ۆەنەسۋەلانىڭ جاڭا باسشىسىن تاعايىنداۋدى ادەيى ۇيىمداستىرعان.

نەگىزىنەن ۆەنەسۋەلا پارلامەنتىنىڭ ۇلتتىق اسسامبلەياسىندا حۋان گۋايدو ءوزىن ۋاقىتشا پرەزيدەنت رەتىندە جاريالاپ، انت قابىلداعان. كاراكاستاعى بيلىككە قارسى ميتينگ بارىسىندا ورىندالعان ءراسىمدى امەريكا باسشىسى بىردەن قولداي كەتتى.

ترامپتىڭ رەسمي مالىمدەمەسىندە: «بۇگىن مەن ۆەنەسۋەلا ۇلتتىق اسسامبلەياسى قابىلداعان حۋان گۋايدونى كەزەكتى پرەزيدەنت رەتىندە مويىندايمىن. ۆەنەسۋەلا ۇلتتىق اسسامبلەياسى جالپىحالىقتىق لەگيتيمدى جالعىز عانا بيلىك ورىنى بولىپ تابىلادى. ال، ۆەنەسۋەلا كونستيتۋتسياسىنا سۇيەنە وتىرىپ، نيكولاس مادۋرونىڭ تاڭدالۋى زاڭسىز دەپ بىلەمىن» دەلىنگەن.

سونداي-اق، اقش باسشىسى ۆەنەسۋەلاداعى دەموكراتيا مەن ەركىندىكتى قالىپتاستىرۋ ءۇشىن ساياسي جانە ەكونوميكالىق شەشىمدەردى قابىلداۋدان دا قالىس قالمايتىندىعىن اتاپ ءوتتى. بۇدان بولەك، لاتىن امەريكاسىنداعى بارلىق مەملەكەتتەردى گۋايدونى پرەزيدەنت رەتىندە مويىنداۋعا شاقىردى.

الايدا، مەكسيكا مەن بوليۆيا ەلدەرىنىڭ باسشىلارى نيكولاس مادۋرونى قولدايتىندىقتارىن ءبىلدىرىپ، ۆەنەسۋەلانىڭ پرەزيدەنتى رەتىندە مويىندايتىندىقتارىن جەتكىزدى.

ەندى بۇل وقيعانىڭ قالاي بولعاندىعىنا قىسقاشا توقتالىپ وتسەك. 2018 جىلدىڭ 20 مامىرىندا ۆەنەسۋەلادا مەرزىمىنەن بۇرىن پرەزيدەنتتىك سايلاۋ ءوتتى. داۋىس بەرۋ قورىتىندىسى بويىنشا نيكولاس مادۋرو التى جىلدىق مەرزىممەن قايتادان ۆەنەسۋەلا باسشىسى اتاندى. 2019 جىلدىڭ 10 قاڭتارىنان باستاپ جاڭا مەرزىمىن باستاعان مادۋرونى «ليم توبى» (لاتىن امەريكاسىنىڭ بىرنەشە مەملەكەتتەرى مەن كانادا ەلى) سايلاۋدىڭ حالىقارالىق ستاندارتتارعا ساي وتپەگەندىگىن ايتىپ، مويىنداماعان بولاتىن.

قازىرگى تاڭدا تۇركيا ەلىنىڭ پرەزيدەنتى رەجەپ تايىپ ەردوعان دا ۆەنەسۋەلالىق ارىپتەسى نيكولاس مادۋرونى قولدايتىندىعىن ءبىلدىرىپ، «مىقتى بول، ءبىز سەنىمەن بىرگەمىز» دەپ اشىق حات جىبەرگەن. سونىمەن قاتار، حاتتا تۇركيا ۆەنەسۋەلا بيلىگىن قانداي دا ءبىر توڭكەرىسپەن باسىپ العىسى كەلەتىندەرمەن كۇرەسۋگە دايىن ەكەندىگىن كورسەتكەن.

"The Qazaq Times"