دونالد ترامپ شۇعىل مالىمدەمە جاساماق

اقش پرەزيدەنتى دونالد ترامپ بيۋدجەت قارجىسىنىڭ بەكىتىلمەۋى مەن مەكسيكامەن شەكارادا دۋال تۇرعىزۋ تۋرالى مالىمدەمە جاساماق.

رەسمي ۋاشينگتون پرەزيدەنتتىڭ قاشان ۇندەۋ جاريالايتىنى بەلگىسىز، الايدا قازىر دايىندالۋ ۇستىندە ەكەندىگىن ايتتى. ترامپ وسىعان دەيىن 8 قاڭتاردا حالىققا جولداۋ جاساپ، مەكسيكامەن اراداعى شەكارا ماسەلەسىنە قاتىستى 5,7 ملرد دوللارعا جۋىق قارجى ءبولۋ كەرەكتىگىن ايقان. بىراق، كونگرەستەگى دەموكراتتار پرەزيدەنتتىڭ بۇل ۇسىنىسىن قابىلداۋدان باس  تارتىپ، بيىلعى بيۋدجەت كولەمى انىقتالعان جوق. بەكىتىلمەگەن بيۋدجەت سالدارىنان 22 جەلتوقساننان بەرى اقش فەدەرالدى بيلىگىنىڭ جۇمىسى ءىشىنارا توقتاتىلدى. ءالى كۇنگە دەيىن قوس تاراپ ءوز ۇستانىمدارىن وزگەرتكەن جوق. جاقىن ارادا كەلىسىمگە كەلۋى دە ەكىتالاي.

بۇل ماسەلەگە قاتىستى دونالد ترامپتىڭ ءوزى: «ۇكىمەتتىڭ تولىعىمەن قاشان جۇمىسقا كىرىسەتىندىگىن ايتا المايمىن. شەكارادا قاقپا تۇرعىزىلمايىنشا «شاتداۋن» جالعاسا بەرەدى. بۇل قابىرعا ەلگە زاڭسىز كىرگىسى كەلەتىندەرگە توسقاۋىل بولادى. جاھاندىق كەسەلگە اينالعان ادام ساۋداسى مەن ەسىرتكى تاسىمالىنا نۇكتە قويادى. قازىرگى ۋاقىتتا ءبىز ادام ساۋدالاۋشىلاردى قولعا ءتۇسىرۋ ءۇشىن جۇمىس ىستەپ جاتىرمىز. ال مەكسيكامەن اراداعى شەكاراعا قاقپا سالىنبايىنشا، وسى اتالعان كەسەلدەرمەن كۇرەسۋ قيىنعا سوعادى»،– دەپ مالىمدەدى.

"The Qazaq Times"