ۆەنەسۋەلا پرەزيدەنتى نيكولاس مادۋرو. فوتو: static.life.ru

پاراگۆاي ۆەنەسۋەلامەن ديپلوماتيالىق قارىم-قاتىناستى ۇزەدى.

بۇل تۋرالى پاراگۆاي پرەزيدەنتى ماريو ابدو بەنيتەس حابارلادى. ەندى كاراكاستاعى ديپلوماتيالىق ميسسيانى ورىنداپ جۇرگەن قىزمەتكەرلەر كەرى قايتارىلادى. ماريو ابدو: «بوليۆاريان رەسپۋبليكاسىنىڭ پرەزيدەنتى قىزمەتىن نيكولاس مادۋرو يەلەنگەندىكتەن، ديپلوماتيالىق بايلانىس توقتايدى. ەلدەگى ەلشىلىك تە جابىلادى. بيلىك باسشىسى مەن ۇستانعان ساياساتى اۋىسپايىنشا، ءبىز دە شەشىمىمىزد وزگەرتپەيمىز»، – دەدى. سونداي-اق پاراگۆاي باسشىسى بۇل قادامنىڭ كونستيتۋتسيالىق وكىلدىك پەن ۇلتتىق ەگەمەندىكتى ورىنداۋ ماقساتىندا جاسالىپ وتىرعانىن ايتتى.
وسىعان دەيىن اقش «ديكتاتور باسقارۋشى» اتانعان نيكولاس مادۋروعا قارسى سانكتسيالار جاريالاپ، مەملەكەت باسشىسى اۆتوريتارلىق ديكتاتۋراعا ۇمتىلۋدان باس تارتپايىنشا، امەريكانىڭ ەكونوميكالىق جانە ديپلوماتيالىق كۇشتەرىن تۇگەل ۆەنەسۋەلا حالقىنىڭ دەموكراتيا ورناتۋ جولىنداعى كۇرەسىنە كومەككە ارنايتىنىن حابارلاعان بولاتىن. دونالد ترامپتىڭ قاجەت بولعان جاعدايدا ۆەنەسۋەلاعا اسكەري ينتەرۆەنتسيا جاسايتىنى تۋرالى مالىمدەمەسىنىڭ سالدارىن جويۋعا نيەتتەنگەن مايك پەنس لاتىن امەريكاسى ەلدەرىنە ساپارى بارىسىندا كاراكاسقا ەكونوميكالىق قىسىم ارقىلى دا اسەر ەتۋگە بولاتىنىن ايتقان. نيكولاس مادۋرو ساياساتىن قاتاڭ سىنعا العان ۆەنەسۋەلانىڭ باس پروكۋرورى لۋيزا ورتەگو: «مەنىڭ قولىمدا نيكولاس مادۋرو مەن ونىڭ سىبايلاستارىن تۇگەل اشكەرەلەيتىن دايەكتەر بار. وندا مەملەكەت باسشىسىنىڭ برازيلياداعى Odebrecht قۇرىلىس كومپانياسىنداعى جەمقورلىق داۋىنا قاتىسى بار ەكەنىن راستايتىن ايعاقتار بار»، – دەپ مالىمدەدى. ال ۆەنەسۋەلا باسشىسىنىڭ ءوزى پاراگۆايمەن اراداعى بايلانىس پەن «ديكتاتورلىق رەجيمگە» قاتىستى جاق اشقان جوق.

"The Qazaq Times"