فوتو: bbci.co.uk

كانادا مەن قىتاي بايلانىسىنا سىزات ءتۇستى. جاقىندا قىتاي سوتى ەسىرتكى تاسىمالىمەن اينالىستى دەگەن كانادالىق ازاماتتى ءولىم جازاسىنا كەستى. ال كانادا تاراپى بۇل شەشىمدى حالىقارالىق دەڭگەيدە ادام قۇقىعىن تاپتاۋ دەپ ايىپ تاقتى.

سوت شەشىمى ءمالىم بولعاننان كەيىن، كانادا پرەمەر-ءمينيسترى جاستين تريۋدو بەيجىڭدى «ادام قۇقىعىن بۇزۋعا باعىتتالعان ادىلەتسىز شەشىم شىعاردى» دەپ اتادى. قاماۋعا الىنعان ازاماتتىڭ وتباسى قىتايدان ناقتى دالەلدەردى تالاپ ەتىپ وتىر.

وسىعان دەيىن قىتايلىق «Huawei» كومپانياسى باسشىسىنىڭ قىزى جانە قارجى ديرەكتورى مىڭ ۆانجوۋ ۋاشينگتوننىڭ سۇراۋى بويىنشا كانادا مەملەكەتىندە تۇتقىندالعان بولاتىن. ساراپشىلاردىڭ ايتۋىنشا، كانادا مەن قىتاي اراسىنداعى ديپلوماتيالىق بايلانىس وسى جاعدايدان باستاپ ۋشىعىپ كەتكەن. ەندى قىتاي سوتى كانادالىق روبەرت شەللەنبەرگكە قاتاڭ جازا قولدانۋ ارقىلى كانادادان ءوشىن الماق.

ايتا كەتەيىك، 20 قاراشادا داليان جەرىندەگى سوت كانادا ازاماتىن 15 جىلعا باس بوستاندىعىنان ايىرۋ تۋرالى شەشىم شىعارعان. بىراق، اراعا ەكى اي سالىپ جازانى وزگەرتتى. ال شەللەنبەرگتىڭ ءوزى قىتايعا تەك تۋريست رەتىندە بارعاندىعىن جانە وزىنە تاعىلعان ايىپتىڭ ادىلەتسىز شەشىم ەكەندىگىن ايتتى.

حالىقارالىق Amnesty International قۇقىق قورعاۋ ۇيىمىنىڭ زەرتتەۋىنە ساي، قىتاي جىل سايىن مىڭداعان ادامدى ءولىم جازاسىنا كەسەدى. سوڭعى رەت 2014 جىلى جاپونيالىق تۋريست ەسىرتكى تاسىمالدادى دەگەن ايىپپەن ءولىم جازاسىنا كەسىلگەن. اتالعان ۇيىمنىڭ ءباسپاسوز ءبولىمىنىڭ مەڭگەرۋشىسى ۋيليام ني: «قىتاي وسى ارەكەتى ارقىلى كاناداعا قاۋىپتى سيگنال جىبەرىپ وتىرعان سىڭايلى. سەبەبى، ايىپ تاعىلعان ازاماتتىڭ ءوزى بۇل ارەكەتتى تۇبەگەيلى جوققا شىعارىپ وتىر. مۇنداي جاعداي سوت بويىنشا ءادىل شەشىمدى تالاپ ەتەدى»، – دەيدى.

"The Qazaq Times"