قىتاي ۇكىمەتى كانادا مەن اقش باستاعان ەلدەردىڭ تالابىنا نارازىلىقپەن جاۋاپ بەردى

كانادا، اقش جانە ونىڭ وداقتاستارى قىتاي ۇكىمەتىنەن سول ەلدە تۇتقىندالعان كانادالىق ازاماتتاردى بوساتۋدى تالاپ ەتكەن بولاتىن. قىتاي ۇكىمەتى دۇيسەنبى كۇنى جاساعان مالىمدەمەسىندە بۇل تالاپتاردى ورىنداۋدان باس تارتتى. بۇل تۋرالى قىتاي ءسىم وكىلى حۋا ءچۇنيىڭ ارنايى ءباسپاسوز ماجىلىسىندە ايتتى.

قىتاي ءسىم وكىلى سوزىندە: «قىتاي تارابى كانادا جانە اقش-پەن قاتار وزگە ەلدەردىڭ مالىمدەمەلەرىنە قاراتا كۇشتى نارازىلىق پەن قارسىلىق تانىتادى»، – دەدى.

بەيجىڭ بيلىگى جەلتوقسان ورتاسىندا «قىتايدىڭ ۇلتتىق قاۋىپسىزدىگىنە زيان كەلتىردى» دەگەن ايىپپەن كانادالىق بۇرىنعى ديپلومات، حالىقارالىق داعدارىستى زەرتتەۋ ۇيىمىنىڭ قازىرگى قىزمەتكەرى كاڭ ميڭكاي مەن بيزنەس-كەڭەسشى مايكل سپارۆەللدى تۇتقىنداعان بولاتىن. بۇلاردان تىس، قىتايدا اعىلشىن ءتىلىن ۇيرەتەتىن كانادالىق ايەل دە تۇتقىندالعان. ول قازىر ۋاقىتتا دەپورتاتسيانى كۇتۋدە.

قىتايدا كانادا ازاماتتارىنىڭ تۇتقىندالۋىنان بۇرىن، اقش-پەن جاسالعان  ەكستراديتسيالاۋ تۋرالى شارتتى ورىنداۋ نەگىزىندە، كانادا تارابى ءوز ەلىندەگى Huawei كومپانياسىنىڭ قارجى ديرەكتورى مىڭ ۋانجوۋدى قۇراما شتات تارابىنىڭ تالابىمەن قولعا العان ەدى. اقش ۇكىمەتى وعان يرانعا باعىتتالعان سانكتسيانى بۇزۋ ءۇشىن الاياقتىقپەن اينالىستى دەگەن ايىپ تاققان بولاتىن. وسى تۇستا قىتاي تارابى كاناداعا ەسكەرتۋ سيپاتىنداعى مالىمدەمە جاساپ، «بۇنىڭ زاردابى اۋىر بولادى» دەگەن سوزدەردى قولدانعان.

كانادانىڭ ءسىم باسشىسى كريستينا فريلاند حانىم وتكەن جۇمادا ەو مەن وزنە دە وداقتاستارىن قىتايدان ازاماتتارىن بوساتۋدى تالابىن قولداۋدى وتىنگەن ەدى. بۇعان بريتانيا مەن گەرمانيا قاتارلى بىرقاتار ەۋروپالىق ەلدەر ءۇن قوسقان. 

الايدا، قىتاي ءسىم-ءىنىڭ ءباسپاسوز حاتشىسى حۋا ءچۇنيڭ حانىم گەرمانيا مەن بريتانيانىڭ مالىمدەمەسىنە نارازىلىق ءبىلدىردى. ول سوزىندە: «مۇددەلى ەلدەردەگىدەي ءتۇرلى ەلدەردىڭ ازاماتتارىنا ءتۇرلى ستاندارتتار بار ما؟ بۇل ماسەلەنىڭ بريتانيامەن، گرەمانيامەن نەمەسە ەو-مەن قانداي قاتىسى بار؟»، – دەپ سالدى.

“The Qazaq Times”