پومپەو ەۋروپادا. فوتو: VOA

اقش مەملەكەتتىك حاتشىسى كاتارداعى ساپارىندا سوڭعى كەزدەرى كوپ ايتىلماي كەتكەن  جۋرناليست حاشوگگي ءىسى تۋرالى جاڭا مالىمدەمە جاسادى. پومپەو جەكسەنبى كۇنى كاتار سىرتقى ىستەر ءمينيسترى ءال-تانيمەن كەزدەسكەن كەزدە، قۇراما شتات ساۋد ارابياسىنىڭ تاق مۇراگەر حانزاداسى مۇحاممەد بين-سالماننان جۋرناليس حاشوگگيدىڭ ولىمىنە قاتىستى كۇدىكتىلەردىڭ جازالانۋىنا كەپىلدىك بەرۋدى تالاپ ەتىپ وتىرعانىن ايتتى.

مايك پومپەو سوزىندە: «ءبىز جۋرناليست حاشوگگيدىڭ ىسىنە قاتىستى كۇدىكتىلەردىڭ جازاعا تارتىلۋى ماسەلەسى بويىنشا مۇراگەر حانزادا بين-سالمانمەن سويلەسۋدى جالعاستىراتىن بولامىز. بۇل قاستاندىقتى قابىلداي المايمىز، حاشوگگي ءىسى سۇراقسىز قالمايدى»، – دەدى.

ەستەرىڭىزدە بولسا، بىلتىر قازان ايىندا ساۋد ارابياسىنىڭ تاق مۇراگەرى مۇحاممەد بين-سالماندى كوبىرەك سىنعا العان جۋرناليست حاشوگگي ساۋد ارابياسىنىڭ ستامبۋلداعى كونسۋلدىعىندا قاستاندىققا ۇشىراعان بولاتىن. تۇركيا بيلىگى ەڭ الدىمەن حاشوگگي ىسىنە بايلانىستى ساۋد بيلىگىن ايىپتاپ، تەرگەۋ تالاپ ەتتى. تۇركيا تارابىنىڭ مالىمەتتەرىنەن جانە اقش-تىڭ ورتالىق بارلاۋ اگەنتتىگىنىڭ (CIA) تەرگەۋ قورىتىندىسى بويىنشا مۇراگەر حانزادانىڭ اتالعان قاستاندىق ىسىنە قاتىسى بار دەگەن بولجام ايتىلعان. الايدا، بۇل ايىپتاۋلار حانزادا مۇحاممەد بين-سالمان جاعىنان تەرىستەلىپ كەلگەن.

اقش مەملەكەتتىك حاتشىسى اتالعان مالىمدەمەسىنەن كەيىن ساۋد ارابياسىنىڭ ورتالىق قالاسىنا ۇشقان بولاتىن. تاياۋ شىعىستاعى ءبىر اپتالىق ساپارىندا پومپەو يوردانيا، يراك، مىسىر، باحرەين، كاتار، بىرىككەن اراب امىرلىكتەرى جانە ساۋد ارابياسى قاتارلى ەلدەرگە ساپارلاي باردى.

ساۋد ارابياسىنداعى ساپارىندا پومپەو تاق مۇراگەر حانزادا جانە سول ەلدىڭ ءسىم باسشىسى مەن اقش-تاعى وكىلەتتى ەلشىلەرىمەن كەزدەسۋ وتكىزەدى. ساۋد بيلىگىمەن حاشوگگي ولىمىنە بايلانىستى تەرگەۋدى جەدەلدەتۋ ماسەلەسى بويىنشا سويلەسپەك.

كاتاردان اتتاناردا پومپەو پارسى شىعاناعىنداعى ەلدەردى دوحا بيلىگىمەن كەلىسپەۋشىلىكتى جويىپ، قارىم-قاتىناستى قالپىنا كەلتىرۋگە شاقىردى.

“The Qazaq Times”