قىرعىزستاننىڭ ءبىلىم مينيسترلىگى جاڭا جۇيە ەنگىزدى

قىرعىز ءتىلىن جاقسى مەڭگەرگەن تۇلەكتەردىڭ 2019 جىلدان باستاپ جوو ءتۇسۋ مۇمكىندىگى ارتپاق. بۇل تۋرالى قىرعىزستاننىڭ ءبىلىم مينيسترلىگىنىڭ ءباسپاسوز-قىزمەتى مالىمدەپ وتىر.

قىرعىز مينيسترلىگنىڭ مالىمەتى بويىنشا، 2019 جىلدان باستاپ ابيتۋريەنتتەر اراسىندا ەركىن تەستىلەۋ وتەتىن بولادى. قىرعىز مەكتەپتەرىندە ءبىلىم الىپ وتىرعىن وقۋشىلار وزدەرىنىڭ ءبىلىم دەڭگەيىن كورسەتىپ، قىرعىز تىلىنەن ۆ1 دارەجەسىنەن تومەن بال الماۋى ءتيىس. بارلىعىن ءساتتى تاپسىرعان تۇلەكتەر جوو-داعى ءاربىر ماماندىققا بەرىلگەن گرانتقا قول جەتكىزۋگە ءبىر تابان جاقىن بولادى.

جاڭا جۇيە بويىنشا، ەگەر قوس ابيتۋريەنتتىڭ بالى بىردەي بولىپ گرانتقا تالاسسا، وندا قىرعىز تىلىنەن جاقسى تاپسىرعان تۇلەك ارنايى سەرتيفيكاتتىڭ ارقاسىندا گرانت يەگەرى اتانا الادى.

قىرعىز ءتىلىن مەملەكەت ىشىندە كوتەرۋدى قولعا العان ءبىلىم مينيسترلىگىنىڭ مۇنداي جۇيەسى كوپتەگەن ايىر قالپاقتى ەلدىڭ تۇرعىندارىنا جۇبانىش بولىپ وتىر. ايتسە دە، وزگە دە ورىس، وزبەك، تاجىك تىلىندە ەركىن سويلەپ، قىرعىز ءتىلىن مەڭگەرمەگەندەر تيىسىنشە ءبىر ساتى تومەن تۇراتىندىقتارىنا نارازى. بىراق، قىرعىز بيلىگى وسى ارقىلى ءتىلدىڭ قايتادان كەڭىنەن قولدانىسقا ەنۋىنە سەپتىگىن تيگىزۋگە بولادى دەپ وتىر.

ەستەرىڭىزگە سالا كەتەيىك، مۇنداي جۇيەنى قازاقستاننىڭ ءبىلىم مينيسترلىگى دە ەنگىزگەن بولاتىن. الايدا، قازاق ءتىلىن بىلگەندەردىڭ ۇستەمدىگىن ارتتىرۋدىڭ ورىنىنا، اۋىلدان شىققان تۇلەكتەرگە باسىمدىلىق بەرگەن.

"The Qazaq Times"