ترامپ دەموكراتتارمەن كەزدەسۋدى ورتادان ءۇزدى

اقش پرەزيدەنتى دونالد ترامپ دەموكراتيالىق پارتيا باسشىلىعىمەن كەزدەسۋدى ورتادان ءۇزدى. وعان دەموكراتتاردىڭ مەكسيكامەن شەكارادا قابىرعا قۇرىلىسىنىڭ جوباسىن قولداۋدان باس تارتقانى سەبەپ.

دەموكراتتاردىڭ اقش-تا مەكسيكامەن شەكارا قۇرىلىسىن سالۋعا 5,7 ملرد دوللار بولۋدەن باس تارتۋىنا بايلانىستى 22 جەلتوقساننان باستاپ «شاتداۋن» دەپ اتالاتىن ۇكىمەت قۇرىلىمدارىنىڭ جۇمىسىن ءىشىنارا توقتاتۋ جالعاسۋدا. ترامپ ءوز سوزىندە: «مەن دەموكراتتارعا مىناداي ساۋال تاستادىم: ەگەر مەن اقش ۇكىمەتىنىڭ جۇمىسىن قايتا باستاسام، سەندەر مەكسيكامەن اراداعى قابىرعانى سالۋ تۋرالى قۇجاتقا قول قوياسىڭدار ما؟ سول كەزدە نەنسي «جوق» دەدى، ال مەن «وندا ساۋ بولىڭدار!» دەپ قىسقا قايىردىم. ەگەر ءبىز وسى قۇرىلىستى باستاساق، گۋمانيتارلىق داعدارىستى توقتاتا الامىز»، – دەپ مەكسيكامەن قابىرعانىڭ اسا ماڭىزدىلىعى تۋرالى مالىمدەدى

پرەزيدەنت دەموكراتيالىق پارتيا وكىلدەرىن الداعى ۋاقىتتا اق ۇيگە شاقىرماق. ول زاڭسىز كوشى-قوندى، ەسىرتكى اعىنىن توقتاتۋ جانە گۋمانيتارلىق داعدارىستى توقتاتۋ ءۇشىن شەكاراداعى مەتالل كەدەرگىنىڭ قۇرىلىسىن قولداۋدى تالقىلايدى. ال وكىلدەر پالاتاسىنىڭ سپيكەرى نەنسي پەلوسي مەن سەناتتاعى دەموكراتيا كوشباسشىسى چاك شۋمەر ترامپقا الدىمەن شاتداۋندى توقتاتىپ، قابىرعا قۇرىلىسى بويىنشا دەبات وتكىزۋ تۋرالى ۇسىنىس ءبىلدىردى.

بۇل «شاتداۋن» – ترامپ بيلىگى كەزىندەگى ءۇشىنشى جانە ەڭ ۇزاققا سوزىلعان ءۇزىلىس. وسى داۋدىڭ سالدارىنان مەملەكەتتىك ورگانداردىڭ 25%-ى قارجىلاندىرۋدان ايىرىلدى. بۇل ىشكى قاۋىپسىزدىك مينيسترلىگى، ساۋدا مينيسترلىگى، ءىىم مەن قارجى مينيسترلىگىنە قاتىستى. سونىمەن قاتار، سميتسون ينستيتۋتىنىڭ ۇلتتىق ساياباقتارى مەن مۇراجايلارى جابىلدى. 800 مىڭنان استام مەملەكەتتىك قىزمەتكەر اقىلى دەمالىسقا كەتتى. بەكىتىلمەگەن بيۋدجەت سالدارىنان 22 جەلتوقساننان بەرى اقش فەدەرالدى بيلىگىنىڭ جۇمىسى ءىشىنارا توقتاتىلدى. قازىرگى شاتداۋن اقش تاريحىنداعى ەڭ ۇزاق ءۇزىلىس بولۋى مۇمكىن. 1995-1996 جىلى بولعان ۇكىمەت ءۇزىلىسى 21 كۇن بويى جالعاسقان.

"The Qazaq Times"