اقش «سولتۇستىك اعىس – 2» جوباسىنا قارسى سانكتسيا ەنگىزۋى مۇمكىن

اقش بيلىگى «سولتۇستىك اعىس – 2» جوباسى توقتاتىلماسا، قۇبىر توسەۋمەن اينالىساتىن ەكى ەۋروپالىق كومپانيالارعا سانكتسيالار ەنگىزۋى مۇمكىن. بۇل تۋرالى گەرمانيا ۇكىمەتىندەگى دەرەككوزدەرگە سىلتەمە جاساعان «Handelsblatt» نەمىس باسىلىمى حابارلادى.

سانكتسيالاردىڭ جوسپارى اقش-تىڭ مەملەكەتتىك دەپارتامەنتىندە ازىرلەنىپ جاتىر. اتالعان قۇبىر جوباسىن بەرليندەگى امەريكالىق ەلشى ريچارد گرەنەل قاتاڭ سىنعا الدى. ول جەرگىلىكتى باسىلىمدارعا سۇحبات بەرىپ، «رەسەيلىك جوبا اياسىندا قۇبىر قۇرىلىسىنا قاتىساتىن كومپانيالار جۇمىسىن توقتاتپاسا، ەكى تاراپ تا قاتاڭ قاۋلىعا ىلىگەدى. امەريكا ەشكىمنىڭ جاپا شەككەنىن قالامايدى. ەگەر «سولتۇستىك اعىس – 2» جالعاساتىن بولسا، ۋكراينانىڭ ەكونوميكالىق جاعدايىنا سوققى بولۋى مۇمكىن»، – دەدى.

مالىمەتتەر بويىنشا، امەريكاندىق سانكتسيالار گاز قۇبىرلارىن توسەۋمەن اينالىساتىن جوعارى مامانداندىرىلعان قۇرىلىس كومپانيالارىنا، ولاردىڭ قاتارىندا شۆەيتساريالىق اllseas كومپانياسىنا جانە Saipem يتالياندىق كومپانياسىنا باعىتتالعان.

1 جەلتوقساندا گەرمانيا كانتسلەرى انگەلا مەركەل رەسەي پرەزيدەنتى ۆلاديمير پۋتينمەن كەزدەسىپ، ۋكراين تەڭىزشىلەرىن تۇتقىننان بوساتۋ تۋرالى تالاپ قويدى. سونىمەن قاتار، گەرمانياداعى حريستيان دەموكراتيالىق پارتياسى (حدپ) كوشباسشىلىعىنا كانديدات فريدريح مەرتس رەسەي مەن ۋكراينا اراسىنداعى قاقتىعىستان كەيىن «سولتۇستىك اعىس – 2» قۇرىلىسىن قايتا قاراۋ كەرەك دەيدى.

بىراق، گەرمانيا ءسىم بۇرىنعى باسشىسى حايكو مااس «سولتۇستىك اعىس – 2» جوباسىنان شىعۋعا بولمايتىنىن ايتتى. سەبەبى، قۇبىر كەز كەلگەن جاعدايدا سالىنادى، ەگەر گەرمانيا جوبادان شىقسا، ۋكراينا ارقىلى بالامالى باعىتتا گاز جەتكىزۋدى جالعاستىرۋ مۇمكىندىگىنەن ايىرىلۋى مۇمكىن.

رەسەيلىك «گازپروم» «سولتۇستىك اعىس-2» كونسورتسيۋمىن باسقارادى. 11 ملرد دوللار بولاتىن قۇرىلىس كەلەسى جىلى اياقتالۋى كەرەك. قۇبىر جۇمىستارى رەسەي گازىنىڭ گەرمانياعا ۋكراينا اۋماعىن اينالىپ ءوتۋ كولەمىن ەكى ەسە ارتتىرۋ ماقساتىندا قولعا الىنعان. رەسەي «سولتۇستىك اعىس – 2» جوباسىمەن بالتىق تەڭىزى جاعالاۋىنان گەرمانياعا دەيىن جىلىنا 55 ميلليارد تەكشە مەتر بولاتىن ەكى گاز جەلىسىن سالۋدى كوزدەيدى. قۇبىر قۇرىلىسىن جۇرگىزۋگە  گەرمانيا، فينليانديا جانە شۆەتسيا رۇقسات بەرگەن. بىراق، لاتۆيا، پولشا جانە ليتۆا تاراپى جوبانىڭ ساياسي باعىتى تۋرالى ايتقاننان كەيىن، گەرمانيا قۇبىر جوباسىن توقتاتۋ تۋرالى ۇسىنىس بىلدىرگەن.

"The Qazaq Times"