فرانتسيادا «سارى جەيدەلىلەر» مينيسترلىك عيماراتىنا باسىپ كىردى

فرانتسيادا «سارى جەيدەلىلەر» ەرەۋىلى قايتا باستالدى. بۇل جولى نارازى توپ ەلدەگى بايلانىس مينيسترلىگىنە باسىپ كىرگەن.

قاراشادا باستالعان شەرۋ وسىمەن سەگىزىنشى رەت ۇيىمداستىرىلىپ وتىر. ەلۋ مىڭنان استام ادام سالىق پەن جانارماي باعاسىن تومەندەتۋدى، نە بولماسا بيلىك باسشىسىنىڭ وتستاۆكاعا كەتۋىن تالاپ ەتتى. گرەنەل كوشەسىنە جينالعان جۇرت فرانتسيا بايلانىس مينيسترلىگىنىڭ عيماراتىنا باسىپ كىرگەن.

فوتو: www.bbc.com

«لە موند» باسىلىمىنىڭ حابارلاۋىنشا، ۇكىمەت نارازى توپپەن بەيبىت كەلىسسوز وتكىزۋ تۋرالى ۇسىنىس بىلدىرگەن. الايدا، شەرۋگە شىققاندار بۇعان كەلىسپەي وتىر. فرانتسيا ۇكىمەتىنىڭ رەسمي وكىلى بەنجامين گريۆو: «فرانتسۋز بيلىگى شەرۋشىلەردىڭ تالابىن ورىندادى. حالىق ەرەۋىلگە شىققان كۇنى-اق پارلامەنت جانارماي سالىعىن كوتەرۋگە شەكتەۋ قويدى. زەينەتاقى مولشەرىن ارتتىرۋعا ءۋادى بەردى. قازىر ءبىزدىڭ تاراپ مەملەكەت پەن نارازىلار اراسىندا بەيبىت ديالوگ وتكىزگىسى كەلەدى. بىراق، بەيبىت ديالوگتان باس تارتىپ، جەرگىلىكتى تۇرعىنداردى بيلىككە قارسى قويعاندار – ەكسترەميستەر. ولاردىڭ باستى ماقساتى ۇكىمەتتى قۇلاتىپ، ەل تىنىشتىعىن بۇزۋ»، – دەپ مالىمدەدى. ال فرانتسيا پرەزيدەنتى ەممانۋەل ماكرون ارنايى مالىمدەمە جاساپ: «ەلدەگى ورىن الىپ جاتقان جاعدايلاردى ىشكى ىستەر مينيسترلىگى قاداعالاپ، كۇن سايىن حاباردار ەتىپ وتىر. ارانداتۋشىلار مەن قۇقىق بۇزعاندار زاڭ الدىندا جاۋاپ بەرەدى. ءبىزدىڭ مەملەكەتىمىزگە بەيبىتشىلىك پەن ىنتىماق قاجەت. بۇلاي جالعاسا بەرسە، فرانتسيا بەيبىتشىلىگىنە نۇقسان كەلەدى»، – دەدى.

17 قاراشادان بەرى فرانتسيادا جانارماي اكتسيزىن كوتەرۋگە قارسىلىق اكتسيالارى ءوتىپ جاتىر. كەي ايماقتاردا شەرۋدىڭ سوڭى تارتىپسىزدىككە ۇلاسىپ، بەس جۇزدەن استام ادام ۇستالدى. الداعى ۋاقىتتا شەرۋ ۇيىمداستىرۋشىلار تەرگەۋگە الىنىپ، قاتاڭ جازا قولدانىلادى.

"The Qazaq Times"