جىل باسىنان بەرى قازاقستاننىڭ ىشكى جاعدايىندا دا بىرنەشە مارتە وزگەرىستەر مەن ەلەۋلى وقيعالار ءجۇرىپ وتىرعاندىعى بەلگىلى. ەلباسىنىڭ سىنىنا جان ۇشىرا جۇگىرەتىن مينيسترلەر بيىل دا تالاي رەت تالقىعا تۇسكەن تاقىرىپتاردى ورىنداۋعا تىرىستى. الايدا، ناقتى ءبىر ناتيجەگە قول جەتكىزۋ بۇگىنگى كۇنگە دەيىن ورىندالمايتىن ۇلكەن ارمان كۇيىندە قالىپ وتىر. سونىڭ بىرنەشەۋىنە قىسقاشا توقتالىپ وتسەك.

از ايلىقپەن قىرۋار جۇمىس اتقارىپ جاتقان ۇزدازداردىڭ اڭگىمەسى بيىل دا توبە كورسەتتى. قاعازبەن سوعىستىڭ سوڭىنا جەتە الماي كەلە جاتقان مۇعالىمدەردىڭ جۇمىسى كۇن سايىن ارتپاسا، ايازايار ەمەس. نەگىزىنەن، قازاقستان تاۋەلسىزدىك العالى بەرى ءبىلىم سالاسىنىڭ رەفورمادان كوز اشپاي كەلە جاتقانىن ەسكەرسەك، مۇنىڭ ءالى دە ۇزاققا دەيىن سوزىلاتىندىعىنا كوز جەتكىزۋ وڭاي. سەبەبى الدىڭعى ءبىلىم مينيسترلەرى سياقتى قازىرگى ءبىلىم جانە عىلىم ءمينيسترى ەرلان ساعاديەۆ تە رەفورما جاساۋدا الدىنا جان سالماۋدا. مۇعالىمدەردىڭ ءبىلىمى مەن قاعازباستى جۇمىس كەستەسىن بىلاي قويعاندا، ۇبت زاڭدىلىقتارىنىڭ ءوزى وسى ۋاقىتقا دەيىن سان مارتە وزگەردى. پرەزيدەنتتىڭ سوڭعى جاساعان جولداۋىنا قاراپ، بۇل وزگەرتۋلەر الداعى ۋاقىتتا توقتامايتىن ءتارىزدى. ساعاديەۆ باستاعان «رەفورماتور ساڭىلاقتار» ءبىلىم سالاسىنا ءالى تالاي «نوۋحاۋ جاڭالىقتار» الىپ كەلەتىنى بەلگىلى. «ءبىلىم سالاسى» دەپ اتالاتىن «ساعاديەۆ سىناق الاڭى» امان بولسا، ۇستازدار مەن وقۋشىلار ەش ۋاقىتتا «رەفورمالانۋدان» تىس تالمايتىنى انىق...

بۇدان كەيىن، ءبىراز ۋاقىت بۇرىن قاۋىپسىزدىك كەڭەس وتىرىسىندا پرەزيدەنت نازارباەۆ كوممۋنالدىق قىزمەت تۇرلەرىنىڭ باعاسى قىمبات ەكەندىگىن ايتىپ، شەندىلەردىڭ جۇمىسىنا ءبىراز سىن ايتقان. وسىدان كەيىن تەز ارادا ىسكە كوشكەن اتقامىنەرلەر ءبىراز وبلىستىڭ مونوپوليستەرىنە ايىپپۇل سالىپ، باعانى باقىلاۋدا ۇستايتىندارىن مالىمدەدى.

وسىلايشا، ءبىرىنشى جەلتوقسانىنان باستاپ تاريفتەر باعاسىن قايتادان تومەندەتۋ جۇمىستارى باستالعان بولاتىن. ۇكىمەت باسشىسى باقىتجان ساعىنتاەۆتىڭ باقىلاۋىنا ىلىككەن تاقىرىپپەن باس پروكۋراتۋرادان ارنايى جۇمىس توبى قۇرىلىپ، تاريفتەردى باقىلاۋ جۇمىستارى جۇرگىزىلدى. بۇدان بولەك ەنەرگەتيكا جانە ۇلتتىق ەكونوميكا مينيسترلىگىنە ارنايى كەستە دايىنداپ، كەلەر جىلدىڭ ءبىرىنشى قاڭتارىنان باستاپ قانداي جۇيەدە جۇمىس ىستەيتىندىگىن دايىنداۋ تاپسىرىلدى.

جالپى، قازاقستاندا كەز كەلگەن مەملەكەتتىك باستاما پرەزيدەنتتىڭ ايتۋىمەن عانا جۇزەگە اساتىنى دا بەلگىلى. بىراق ءبىر قىزىعى وسىدان تۋرا ءبىر جىل بۇرىن قىركۇيەك ايىنىڭ باسىندا نۇرسۇلتان نازارباەۆ ءدال وسى تۇرعىن ءۇي-كوممۋنالدىق شارۋاشىعىنا قاتىستى زاڭدى جەتىلدىرۋ كەرەكتىگى تۋرالى ۇكىمەتكە تاپسىرما بەرگەن. ول "سۋ جانە جىلۋ جۇيەسىن مودەرنيزاتسيالاۋعا كوپ قاراجات قاجەت ەكەنىن" ايتىپ:

"حالىقارالىق قارجى ينستيتۋتتارى مەن ينۆەستورلاردى تارتۋ ءۇشىن تۇرعىن ءۇي كوممۋنالدىق شارۋاشىلىعى جونىندەگى زاڭدى جەتىلدىرىپ، تاريفتەردى قايتا قاراۋ كەرەك. بۇل وسى سالاداعى تۇتىنۋشىلار مەن تابيعي مونوپوليا سۋبەكتىلەرىنىڭ قىزىعۋشىلىعىن قالىپتى ەتۋگە مۇمكىندىك بەرەدى. مەنىڭ ايتقىم كەلگەنى، ءبىز جىلۋ مەن سۋ تاريفتەرىن كوتەرمەسەك، ينۆەستورلار كەلمەيدى. ويتكەنى ءاربىر كەلگەن ينۆەستور "مەن ستانتسيا سالايىن، بىراق ەلەكتر ەنەرگياسىن قانشاعا ساتا الامىن؟" دەپ سۇرايدى. ودان قورقۋدىڭ (تاريفتەردى قىمباتتاتۋ - رەد.) قاجەتى جوق", - دەپ مالىمدەگەن.

ايتسە دە، وسىدان ءبىر جىل بۇرىن پرەزيدەنت تاپسىرماسىن جۇزەگە اسىرۋ ءۇشىن تاريفتەردى قىمباتقان شەندىلەر، ەندى ونى قايتادان ارزانداتۋعا بىلەك سىبانا كىرىسىپ كەتتى. قانداي دا ءبىر ساياسي ناۋقاننىڭ الدىندا عانا قايتا قارالاتىن كوممۋنالدىق قىزمەت تۇرلەرىنىڭ جىرى قاشان ناقتى ءبىر جولعا تۇسەتىندىگى بەلگىسىز. دەسە دە، ساراپشىلار «ۇكىمەنتتىڭ سوڭعى ۋاقىتتارى «جان ۇشىرا» ارەكەت ەتىپ جاتقانىنا قاراعاندا، كەلەسى جىلى ەلدە مەرزىمىنەن بۇرىن پرەزيدەنت سايلاۋى ءوتۋى مۇمكىن» دەگەن بولجام ايتۋدا.

"The Qazaq Times"