اندرەي كارپوۆيچ. فوتو: Zakon.kz

بيىل «قايرات» كلۋبىنا ەل كۋبوگىن الىپ بەرگەن مامان اندرەي كارپوۆيچ الماتىلىق ۇجىم ساپىنان كەتتى. بۇل تۋرالى كارپوۆيچ ءوز سۇحباتىندا ايتقان.

ونىڭ ايتۋىنشا، «قايرات» باسشىلىعى اندرەيدىڭ كلۋب قۇرىلىمىندا قالۋىن جانە باپكەرلەر شتابىنا كىرۋىن قالاپ، ۇسىنىس جاساعان. الايدا مامان بۇل ۇسىنىسقا قارسىلىق تانىتقان. ماۋسىم ارالىق ءۇزىلىس كەزىندە كومانداعا 30 جاستاعى بەلورۋسيالىق مامان الەكسەي شپيلەۆسكي باس باپكەر بولىپ كەلگەن ەدى.

«باسشىلىق تاراپىنان ۇسىنىس بولدى. بىراق جەكە سەبەپتەرگە بايلانىستى مەن باس تارتتىم. قازىرگى جاعدايدا مەنىڭ «قايراتقا» تيگىزەر پايدام شامالى. بۇل جەردە قالۋ تۋرالى ەش ءمان-ماعىنا كورىپ تۇرعان جوقپىن. فۋتبولعا دەگەن كوزقاراستان باستاپ، ويىن فيلوسوفياسى جايىندا وي-پىكىرىمىز تۇيىسە قويمايدى. باپكەرلىكتى ەندى باستاپ كەلە جاتقان مامان رەتىندە ءوسۋ كەرەك» دەپتى كارپوۆيچ.

37 جاستاعى كارپوۆيچ «قايراتتىڭ» باپكەرلەر قۇرامىنا 2017 جىلدىڭ مامىر ايىندا كىرگەن. وسى ماۋسىمدا باس باپكەر كارلوس الوس فەررەر قىزمەتتەن كەتكەننەن كەيىن باس باپكەردىڭ مىندەتىن اتقارۋ كارپوۆيچكە جۇكتەلگەن ەدى. ونىڭ باسشىلىعىمەن كوماندا پرەمەر-ليگادا بەس كەزدەسۋ وتكىزىپ، قازاقستان كۋبوگىن جەڭىپ الدى.

قازىرگى تاڭدا اندرەي كوكشەتاۋلىق «وقجەتپەس» كلۋبىنا باس باپكەر بولىپ بارادى دەگەن سىبىس بار. كوكشەلىك كوماندا ءبىرىنشى ليگادان بيىل عانا پرەمەر-ليگاعا ورالعان.

كارپوۆيچ – سەمەي فۋتبولىنىڭ تۇلەگى. ءار جىلدارى «ەلىماي»، «ەرتىس»، «قايرات» كلۋبتارىندا وينادى. 2002-2003 جىلدارى رەسەيلىك «روستوۆ» ساپىندا دا ونەر كورسەتتى. ۇلتتىق قۇرامادا دا تابىستى وينادى. 54 ماتچقا قاتىسىپ، ءۇش مارتە مەرگەندىگىمەن تانىلدى. سونىڭ ءبىرى 2006 جىلى الەم چەمپيوناتىنا ىرىكتەۋ ويىندارى اياسىندا ۋكراينا قاقپاسىنا سوققان گولى. بۇل – قازاقستان قۇراماسىنىڭ ۋەفا قۇرامىنا كىرگەننەن كەيىنگى العاشقى تاريحي گولى ەدى.

"The Qazaq Times"