وزبەك پرەمەرى ەكس-پرەزيدەنت كارىموۆتىڭ ساياساتىن سىنعا الدى

وزبەكستان پرەمەر-ءمينيسترى ابدۋللا اريپوۆ ەكس-پرەزيدەنت يسلام كارىموۆتىڭ ساياساتىن سىنعا الدى.

جەلتوقسان ايىنىڭ 22-ءى كۇنى تاشكەنت قالاسىندا وتكەن ايەلدەر كوميتەتىنىڭ جىلدىق قورىتىندى وتىرىسىندا ابدۋللا اريپوۆ شەتەلدە جۇمىس ىستەپ جۇرگەن ميگرانتتارعا قاتىستى مالىمدەمە جاساعان.

«وزگە ەلگە جۇمىس ىزدەپ بارۋدىڭ قاجەتى قانشا؟ سەبەبى ءبىز وسى جەردە جۇمىس ىستەۋگە جاعداي جاسامادىق. ءبىزدىڭ وسى ۋاقىتقا دەيىن جاساعانىمىز «شەتەلگە بارىپ جۇمىس ىستەگەن ادام - جالقاۋ» دەگەن تۇسىنىك قالىپتاستىرۋ بولدى. ولاي بولاتىن بولسا، وسى جەردەگى «جالقاۋ ەمەستەرگە» جۇمىس تاۋىپ بەر» - دەدى اريپوۆ.

ەستەرىڭىزگە سالايىق، 2013 جىلى وزبەكستاننىڭ ەكس-پرەزيدەنتى يسلام كارىموۆ جيزاق وبلىسىنا جاساعان ساپارىندا شەتەلگە جۇمىس ىستەۋگە كەتكەن وزبەكستاندىقتاردى «جالقاۋلار» دەپ اتاپ، وزبەك ۇلتىنىڭ ابىرويىن تومەندەتىپ جۇرگەن ميگرانتتار دەپ مالىمدەگەن.

يسلام كارىموۆتىڭ تۇسىندا وزبەكستان ۇكىمەتى جىل سايىن رەسپۋبليكا بويىنشا 1 ميلليوننان استام جاڭا جۇمىس ورنى اشىلدى دەگەن ستاتيستيكالىق مالىمەت تاراتاتىن.

"The Qazaq Times"