باتىس ەلدەرى سۋدان بيلىگىنە ەسكەرتۋ جاسادى

سۋدانداعى نارازىلىق شارالارىندا ۇكىمەت تارابىنىڭ كۇش قولدانىپ، نارازىلىق بىلدىرگەن جۇرتشىلىققا قاراتا وق اتقانى ءمالىم. بۇعان قارسى اقش، ۇلىبريتانيا، كانادا مەن نورۆەگيا ەلدەرى قاتارلى باتىس ەلدەرى الاڭداۋشىلىق ءبىلدىردى.

اتالعان ەلدەردىڭ بۇل تۋرالى رەسمي مالىمدەمەلەرىندە، سوڭعى ميتينگىدە ۇكىمەت تارابىنىڭ قارۋلى كۇش قولدانۋ ارەكەتىنە الاڭداۋشىلىق بىلدىرەتىنىن، سۋدان حالقىنىڭ بەيبىت شەرۋلەر ارقىلى ۇكىمەتتەن ءوز پروبلەمالارىن شەشۋدى تالاپ ەتۋ قۇقىعىنىڭ بار ەكەنىن ەسكەرتكەن. سونداي-اق، سۋدان بيلىگىن ءسوز بوستاندىعى مەن ازاماتتاردىڭ قۇقىعىن قورعاۋعا شاقىرعان.

وتكەن اپتادا سۋدانداعى بىرنەشە قالادا نارازىلىق شەرۋلەرى بولعان ەدى. شەرۋگە شىققان سۋداندىقتار دوللار باعامىنىڭ كۇرد ءوسۋى مەن ازىق-تۇلىكتىڭ قىمباتتاۋىنا نارازىلىعىن بىلدىرگەن بولاتىن. رەسمي مالىمەتتەردە 8 ادام قازا تاپقانى ايتىلادى. الايدا، وپپوزيتسيا وكىلدەرى تاراتقان مالىمەت بويىنشا 22 ادام كوز جۇمعان. نارازىلىق اكتسياسى كەزىندە جاپپاي تارتىپسىزدىك ورىن العانى ايتىلادى.

سۋدان بيلىگىنە نارازىلىق بىلدىرگەن باتىس ەلدەرىنىڭ قاتارى كۇن ساناپ ارتىپ كەلەدى. ەلدەگى تۇراقسىزدىق پەن حالىقارالىق جاعداي بۇرىنعى ليۆيا مەن ءسۇريانى ەسكە سالادى.

“The Qazaq Times”