ترامپ پاتريك شاناحاندى پەنتاگون باسشىسى ەتپەك. فوتو: REUTERS/BBC.

بۇعان دەيىن اقش قورعانىس ءمينيسترىنىڭ ورىنباسارلىق قىزمەتىن وتكە كەلگەن پاتريك شاناحان 2019 جىلدىڭ العاشقى كۇنىنەن باستاپ پەنتاگوننىڭ باسشىسى رەتىندە قىزمەت اتقارا باستايدى. ەستەرىڭىزدە بولسا، پەنتاگون باسشىسى جەيمس مەتتيس وتكەن جۇما كۇنى پرەزيدەنت ترامپپەن كوزقاراسى سايكەس كەلمەگەنىن ايتىپ، قىزمەتتەن باس تارتاتىنىن مالىمدەگەن بولاتىن.

جاڭا قورعانىس ءمينيسترى تۋرالى اقش پرەزيدەنتى ءوزىنىڭ «تۆيتتەر» پاراقشاسى ارقىلى مالىمدەدى. ترامپ: «ءبىزدىڭ قورعانىس ءمينيسترىنىڭ تالانتتى ورىنباسارى پاتريك شاناحان 1 قاڭتاردان باستاپ قورعانىس ءمينيسترى قىزمەتىن اتقارا باستايتىنىن قۋانا وتىرىپ مالىمدەيمىن. پاتيرك ءمينيستردىڭ ورىنباسارى بولىپ ىستەپ تۇرعان كەزىندە تابىستى قىزمەتىمەن كوزگە تۇسكەن بولاتىن»، – دەدى «تۆيتتەردەگى» مالىمدەمەسىندە.

وسىعان دەيىن پەنتاگوندى باسقارىپ كەلگەن جەيمس مەتتيس وتكەن اپتادا كوزقاراستاعى قايشىلىق ءۇشىن پرەزيدەنت ترامپتان ءوز وتستاۆكاسىن تالاپ ەتىپ حات جولداعان ەدى. بۇدان بۇرىن پرەزيدەنت ترامپ ءسۇريادان اقش اسكەرلەرىن شىعارىپ اكەتۋ تۋرالى شەشىم شىعارعان بولاتىن.

اقش جانە وزگە دە الەم ەلدەرىنىڭ اقپارات قۇرالدارى مەتتيستىڭ قىزمەتتەن كەتۋىن ترامپ ۇكىمەتىنىڭ اۋعانستان مەن سۇرياداعى اسكەر شەگىندىرۋ شەشىمدەرىنە تىكەلەي قاتىستى دەگەن پىكىرلەر ايتىلادى. سەبەبى، جەيمس مەتتس حاتىندا: «مەنىڭ ۇستانعان نەگىزگى سەنىمدەرىمنىڭ ءبىرى – ەل رەتىندە ءبىزدىڭ كۇش-قۋاتىمىز ۋنيكالدى جانە بارلىعىن قامتىعان ىنتىماقتاستىق پەن وداقتاستارىمىزدا. ءبىز قۋاتتى اليانستاردى قولداماي تۇرىپ، وداقتاستارىمىزدى سىيلاماي تۇرىپ ءوزىمىزدىڭ مۇددەنى قورعاي المايمىز. ايتالىق، قىتاي مەن رەسەي وزدەرىنىڭ اۆتوريتارلىق مودەلىنە ساي كەلگەن الەمدى قۇرعىسى كەلەدى... وسى جانە وزگە دە كوپتەگەن ماسەلەلەردە كوزقاراستارىڭىز سايكەس كەلگەن قورعانىس ءمينيسترىن تاعايىنداۋعا ءسىزدىڭ قۇقىعىڭىز بار. سوندىقتان، مەن قىزمەتتەن كەتۋ تۋرالى شەشىم قابىلدادىم»، – دەپ جازعان جەيمس ءوز حاتىندا.

الايدا، مەتتيستىڭ وتستاۆكاعا كەتۋى ۋاشينگتون بيلىگى وكىلدەرى اراسىندا كۇشتى ءدۇمپۋ تۋدىردى. اقش بيلىگىندەگى رەسپۋبليكاشىلدار دا دەموكراتتار دا گەنەرال مەتتيستىڭ ىسكەرلىگىن جوعارى باعالايدى. ءتىپتى، كەيبىر لاۋازىمدىلار مەتتيستىڭ قىزمەتتەن كەتۋى اقش قورعانىسى ءۇشىن ورىنسىز شىعىن دەپ قارايدى.

“The Qazaq Times”