قىرعىزستاندا سىپايى دارىگەرلەردىڭ جالاقىسى ءوسۋى مۇمكىن

قىرعىزستاننىڭ ۆيتسە-پرەمەرى التىناي ومىربەكوۆا سىپايى دارىگەرلەردىڭ جالاقىسى 15 پايىز ءوسۋى مۇمكىن ەكەندىگىن مالىمدەدى. قازىرگى تاڭدا قىرعىز بيلىگى اتالعان مۇمكىندىكتى قاراستىرىپ، بارلىق جاعداي تالقىلانۋ ۇستىندە ەكەندىگىن جەتكىزدى.

ۆيتسە-پرەمەردىڭ سوزىنشە، ناۋقاس جانداردان دورەكى دارىگەرلەردىڭ اتىنا جازىلعان شاعىم تىم كوبەيىپ كەتكەن. ءدال وسى قيىندىقتى شەشۋ ماقساتىندا جاڭا جۇيە ەنگىزىلۋى مۇمكىن. جالاقىعا قوسىمشا 15 پايىز ۇستەماقىنى تەك، جىل بويى ءوزىن سىپايى كورسەتىپ، ەشقانداي شاعىم تۇسپەگەن دارىگەرلەر عانا يەمدەنەتىن بولادى. الايدا، قىرعىز ۆيتسە-ءمينيسترى التىناي ومىربەكوۆا بۇل جۇيەدە بارلىق تۇسكەن شاعىمداردىڭ قارالاتىندىعى بولماسا ناقتى ءبىر ءتارتىپتىڭ بۇزىلعانى انىقتالعان شاعىمدار عانا ەسەپتەلەتىنى تۋرالى اشىپ ايتقان جوق.

ەستەرىڭىزگە سالا كەتەيىك، 1 قازاننان باستاپ قىرعىز ەلىندە دارىگەرلەردىڭ ەڭبەگىنە تولەنەتىن قاراجاتقا جاڭا جۇيە ەنگىزىلگەن بولاتىن. ەندى جالاقىنىڭ كولەمى ارنايى بالدىق كورسەتكىشپەن ولشەنەتىن بولادى. مىسالى، گيپەرتونيا ناۋقاستارىن ەڭ كوپ قاراعان دارىگەر، سايكەسىنشە كوپ قاراجات الۋىنا مۇمكىندىك بار. بىراق، العاشقى ايدان باستاپ دارىگەرلەر بەلگىلەنگەن بالدىق كورسەتكىشكە جەتۋ مۇمكىن ەمەس ەكەندىگىن ايتىپ، بىرنەشە رەت شەرۋگە شىققان بولاتىن. الايدا، قىرعىزستاننىڭ دەنساۋلىق ساقتاۋ مينيسترلىگى بۇل جوبانىڭ بولاشاقتا ءساتتى ەنەتىنىنە سەنىممەن قاراپ وتىر. سونىمەن قاتار، ءدال وسىنداي جاڭا جۇيەنى قىرعىز مەكتەپتەرىنىڭ مۇعالىمدەرىنە ەنگىزۋ دە قاراستىرىلۋدا.

 "The Qazaq Times"