پۋتين زىمىران كەلىسىمىنە قاتىستى مالىمدەمە جاسادى

رەسەي پرەزيدەنتى ۆلاديمير پۋتين زىمىران كەلىسىمىنە قاتىستى ارنايى مالىمدەمە جاسادى.

18 جەلتوقساندا پۋتين رەسەيدىڭ اگرەسسيۆتى ساياساتىنا ۇيرەنگەندەر ءۇشىن ويلانتاتىنداي دەڭگەيدە قارۋلانعانىن ايتتى. سونداي-اق اقش-تىڭ رەسەي ورتا جانە قىسقا قاشىقتىققا ۇشاتىن زىمىرانداردى جويۋ تۋرالى كەلىسىمدى بۇزدى دەگەن ايىپتاۋىن جوققا شىعاردى. ءوز سوزىندە ول رەسەي مەن اقش اراسىنداعى قارۋلانۋدى باقىلاۋ تۋرالى كەلىسىم اياسىندا جاڭادان كەلىسسوزدەر وتكىزۋگە ءازىر ەكەنىن جانە بۇل كەلىسىمگە باسقا ەلدى قوسۋ تۋرالى وي ءبىلدىردى.

بۇعان دەيىن زىمىران كەلىسىمىنە قاتىستى اقش پرەزيدەنتى دونالد ترامپ: «قازىرگى ۋاقىتتا مۇنداي كەلىسىمگە وتىرماعان وزگە ەلدەر اسكەري زىمىران جۇيەسىن جاساقتاپ، قالاعانىنشا قولدانىپ وتىر. سول سەبەپتى امەريكا مەن رەسەي اراسىنداعى ەكىجاقتى كەلىسىمدە ەش ءمان قالعان جوق. شارت جاساماعان قىتاي، سولتۇستىك كورەيا، يران سياقتى باسقا دا مەملەكەتتەر ويىنا كەلگەندى ىستەپ وتىر. ەگەر بۇل كەلىسىمگە قىتاي دا ەنسە، جۇمىستاردىڭ باسىم بولىگى يادرولىق كەلىسىمگە قايشى كەلەر ەدى»، – دەگەن بولاتىن. ال ناتو باس حاتشىسى يەنس ستولتەنبەرگ: «رەسەي زىمىران كەلىسىمىندەگى وزىنە جۇكتەلگەن مىندەتتەردى ورىنداماي وتىر. ال اقش كەرىسىنشە، كەلىسىم نەگىزىندە جۇمىس ىستەۋدە. بىراق كەلىسىم ورىندالۋ ءۇشىن بۇل جەتكىلىكسىز. ناتو جاڭا قارۋلانۋ جارىسى بولعانىن قالامايدى»، – دەپ، رەسەيگە سوڭعى مۇمكىندىك بەرەتىنىن ايتتى.

اقش پەن رەسەي اراسىنداعى زىمىران كەلىسىمىنە 1987 جىلى قول قويىلعان. كەلىسىم بويىنشا، قوس تاراپقا 500 جانە 5,5 مىڭ شاقىرىم قاشىقتىققا ۇشاتىن بالليستيكالىق زىمىرانداردى جاساۋعا تىيىم سالىنعان. ماسكەۋ دە، ۋاشينگتون دا وسى ۋاقىتقا دەيىن ءبىر-ءبىرىن زىمىران كەلىسىمىن بۇزدى دەپ بىرنەشە رەت ايىپتاعان.

"The Qazaq Times"