ەو ەردوعاننىڭ مالىمدەمەسىنە الاڭداۋشىلىق ءبىلدىردى

ەۋروپالىق وداق تۇركيانىڭ ءسۇريادا اسكەري وپەراتسيا باستاۋ تۋرالى جوسپارىنا الاڭداۋشىلىق ءبىلدىردى.

ەۋرووداق ديپلوماتياسىنىڭ باسشىسى فەدەريكا موگەريني ارنايى مالىمدەمە جاساپ، ءسۇريانىڭ سولتۇستىك-شىعىسىندا اسكەري وقۋ-جاتتىعۋ جۇرگىزۋدىڭ قانشالىقتى قاۋىپتى ەكەندىگىن اتاپ ءوتتى. فەدەريكا موگەريني: «تۇركيانىڭ ءسۇريانىڭ سولتۇستىك-شىعىسىندا اسكەري وپەراتسيا جۇرگىزۋ تۋرالى مالىمدەمەسى الاڭداۋشىلىق تۋدىردى. تۇركيا ايماقتاعى جانە وسى داعدارىستا ماڭىزدى رولگە يە مەملەكەت. ءبىز ءسۇريادا بەلەڭ العان لاڭكەستىكتى جويىپ، زورلىق-زومبىلىقتى توقتاتۋ جانە مىزعىماس تۇراقتىلىق ورناتۋدى قولدايمىز. سول سەبەپتى تۇركيا بيلىگى وداقتاس ەلدەردىڭ «يراك جانە لەۆانت لاڭكەستىك ۇيىمىنا» قارسى كۇرەسىنە نۇقسان كەلتىرىپ، وسى مەملەكەتتە تۇراقسىزدىق تۋدىراتىن بىرجاقتى ارەكەتتەرىن توقتاتۋعا سەپ بولادى دەگەن ۇمىتتەمىز». ونىڭ ايتۋىنشا، سۇرياعا قاتىستى كەز كەلگەن ماسەلە 2012 جىلعى جەنەۆا كومميۋنيكەسى مەن بۇۇ قاۋىپسىزدىك كەڭەسىنىڭ 2254-ءشى قارارىنا ساي جۇزەگە اسىرىلۋى ءتيىس.

وسى اپتادا تۇركيا پرەزيدەنتى رەجەپ تايىپ ەردوعان سۇرياداعى كۇرد جاساقتارىنا قارسى ەفرات وزەنىنىڭ شىعىس جاعالاۋىندا اسكەري وپەراتسيا جۇرگىزۋگە نيەتتى ەكەنىن ايتقان.

ايتا كەتەيىك، 2016 جىلى تۇركيا ۇكىمەتى تۇركيانىڭ سەپاراتيستەرىن قولداپ، «يسلام مەملەكەتى» تەررورلىق ۇيىمىنىڭ ماڭىزدى ايماعى جارابۋلۋس جانە ءال-باب قالالارىن تەررورلىق توپتان ازات ەتكەن. وسىدان كەيىن رەسمي انكارا YPG-دىڭ باتىسقا باعىتتالعان ارەكەتتەرىن توقتاتۋدى كوزدەپ، تۇركيامەن شەكتەسىپ جاتقان ايماقتاردى ءوز باقىلاۋىنا الۋعا تىرىسقان. وتكەن جىلى قازان ايىندا تۇركيا بيلىگى رەسەي جانە يرانمەن كەلىسىپ، يدليب پروۆينتسياسىنا اسكەرلەرىن كىرگىزگەن بولاتىن. وسى ارقىلى ءسۇريانىڭ ۇكىمەت كۇشتەرى مەن بولشەكتەۋشى كۇشتەرى اراسىنداعى قاقتىعىستى توقتاتۋعا بولادى دەگەن. تۇركيا پرەزيدەنتى ەردوعان ناتو جانە اقش-تى «ءسۇريا دەموكراتيالىق كۇشتەرىن» تۇركيا شەكاراسىنا جاقىن اۋماقتا اسكەري جاتتىعۋلار وتكىزبەۋگە شاقىرعان. سەبەبى، اقش «يم» ۇيىمىنا قارسى كۇرەسۋ ءۇشىن ءسۇريانىڭ تۇركيا جانە يراكقا شەكارالاس جەرىندە 30 مىڭ قۇرالدى جاساقتى جاتتىقتىرۋ جوسپارىن جاريا ەتكەن.

"The Qazaq Times"