ەو ۋكراينا قاۋىپسىزدىگىنە نۇقسان كەلتىرەتىن رەسەيلىك جوبانى توقتاتپاق

ەۋروپالىق وداق ەلدەرى گەرمانيا مەن رەسەي اراسىنا سالىناتىن «سولتۇستىك اعىس – 2» گاز قۇبىرىنىڭ قۇرىلىسىن جالعاستىرماۋ جايلى ۇسىنىس ءبىلدىردى.

اتالعان جوبانى ەۋروپارلامەنت وكىلدەرى ەكونوميكالىق جاعدايعا باعىتتالماعان «ساياسي كەلىسىم» دەپ اتاپ، قۇرىلىستى توقتاتۋ تۋرالى ارنايى قارار شىعاردى. قاراردا گاز قۇبىرىنىڭ ۋكراينا ايماعى مەن وسى ەلدەن گاز الىپ وتىرعان ەۋروپا ەلدەرىنىڭ قاۋىپسىزدىگىنە قاۋىپتى ەكەندىگى جازلىعان. داۋىس بەرۋ بارىسىندا بۇل ۇسىنىسقا 433 دەپۋتات قولداۋ ءبىلدىرىپ، جۇزگە جۋىعى قارسى بولعان. وسىعان وراي گەرمانيا حدس پارتياسىنىڭ باس حاتشىسى اننەگرەت كرامپ-كاررەنباۋەر «ARD» تەلەارناسىنىڭ ەفيرىندە قۇرىلىستى توقتاتۋ ارقىلى گەرمانيا رەسەيگە قارسى قاتاڭ پوزيتسيا ۇستانۋى ءتيىس دەپ مالىمدەدى.

«سولتۇستىك اعىس – 2» قۇبىرى رەسەيدە وندىرىلگەن تابيعي گازدى ۋكراينا مەن پولشا جەرىنەن اينالىپ ءوتىپ، بالتىق تەڭىزىنىڭ تابانى ارقىلى باتىس ەۋروپاعا جەتكىزىلەدى. قۇنى 11 ملرد دوللار بولاتىن قۇرىلىس 2019 جىلى اياقتالسا، ەۋروپاعا جىلىنا 55 ميلليارد تەكشە مەتر گاز بارادى دەپ جوسپارلانعان.

جالپى العاندا، اقش، ۋكراينا جانە شىعىس پەن ورتالىق ەۋروپا ەلدەرى قۇبىر قۇرىلىسىنىڭ جالعاسۋىنا تۇبەگەيلى قارسى، ويتكەنى بۇل ءوز اۋماعى ارقىلى رەسەي گازىنىڭ ءترانزيتى ءۇشىن سالىق الا المايتىن ۋكرايناعا كوپ كولەمدە زيان كەلتىرەدى. ۋاشينگتون بۇل گاز قۇبىرى الداعى ون جىلدىقتاردا گەرمانيانىڭ رەسەيگە ەنەرگەتيكالىق تاۋەلدىلىگىن ارتتىرادى دەپ سانايدى. وسىعان دەيىن ەكى ەل اراسىنداعى «سولتۇستىك اعىس – 2» جوباسىن توقتاتۋ ارقىلى گەرمانيا تاراپى رەسەيگە قارسى قىسىم كورسەتۋدى جوسپارلايتىنىن ايتقان بولاتىن. اتاپ ايتقاندا، رەسەي ۋكراينانىڭ ءۇش كەمەسىن باسىپ العان كەرچ بۇعازىنداعى وقيعالارعا بايلانىستى «سولتۇستىك اعىس – 2» گاز قۇبىرىنا بايلانىستى كەلىسىمدى قايتا قاراۋدى ۇسىندى.

"The Qazaq Times"