دايش تەررورلىق ۇيىمىنىڭ مۇشەلەرى ورتا ازياعا قايتا ورالۋى مۇمكىن

ماسكەۋدە وتكەن تمد ەلدەرىنىڭ قاۋىپسىزدىك ۇيىمدارىنىڭ باسشىلار وتىرىسىندا ءسۇريا (سيريا) سوعىسىنداعى ەكسترەميستەردى انىقتاۋ جانە ولاردىڭ تمد اۋماعىنا كىرۋىنىڭ الدىن الۋ تۋرالى تالقىلاندى. وتىرىستىڭ تاعى ءبىر ماقساتى – تەررورشىل توپتاردى قارجىمەن قامتاماسىز ەتۋدىڭ الدىن الۋ شاراسىن تالقىلاۋ بولدى.

پارسى اقپاراتى حابارلاپ وتىر: ماسكەۋ وتىرىسىندا تمد لاڭكەستىككە قارسى تۇرۋ ورتالىعىنىڭ باسشىسى دايش توبىنا قاتىسۋعا ۇمىتكەر ەكسترەميستەردىڭ ازايۋىنا توقتالا كەلىپ، ۇيىمداعى ەكسترەميستەردىڭ ءوز ەلدەرىنە قايتۋعا تالپىنىپ جاتقانىن حابارلادى. وعان ءسۇريا  مەن يراكتاعى تەررورلىق ۇيىمداردىڭ السىرەپ، ۇكىمەتتىك جانە حالىقتىق ۇيىمداردىڭ نىعايۋى، سونداي-اق، تەررورلىق ۇيىمداردىڭ سوعىس مايدانىندا ارت-ارتىنان جەڭىلىس تابۋى سەبەپ بولعان.

دايش ۇيىمىنا قاتىسقان ەكسترەميستەردىڭ ءوز ەلىنە قايتۋعا تالپىنىس جاساۋى، ورتا ازيا ەلدەرىنە اسا قاۋىپتى بولارى انىق. ورتا ازيادان ءسۇريا سوعىسىن قاتىسىپ جاتقان ەكسترەميستەر سانى ءبىرشاما كوپ. ولار ءوز ەلدەرىنە قايتىپ ورالسا، لاڭكەستىك شابۋىل جاساۋ تاجىريبەلەرى مەن لاڭكەستىك يدەيانى الا كەلمەك. كەزىندە ءوز ەلدەرىنەن سۇرياعا اتتانعان اسىرەشىلدەرگە كوز جۇما قاراعان ەلدەر، ەندىگى جەردە سونىڭ زاردابىن تارتۋى ىقتيمال. ورتا ازيا مەن كاۆكاز ەلدەرىنەن تىس، ءسۇريا ۇكىمەتىنە قارسى ۇيىمدارعا قولداۋ كورسەتكەن ايماقتى، ەۋروپالىق ەلدەرىنىڭ ءبارى دە بۇنىڭ زاردابىنان اۋلاق بولا المايدى.

ورتا ازيا ەلدەرى تەرروريزم مەن ەكسترەميزمگە قارسى تۇرۋ جاعىندا ەۋروپادان كوپ ارتتا. ەكسترەميستىك توپتارعا جاناسۋ، ولاردىڭ ۇگىتىن قابىلداۋعا بەيىم بولىپ سانالادى. ەگەر ءسۇريا مايدانىن تاستاپ، ءوز ەلىنە قايتاتىن ەكسترەميستەر تمد اۋماعىنا، ورتالىق ازيا ەلدەرىنە ورالار بولسا، بۇل ەلدەردەگى لاڭكەستىك جاعداي اۋىرلاي تۇسەدى. حالىقتىڭ اماندىعى مەن مەملەكەت ورنىقتىلىعىنا اۋىر قاتەر كەلەتىن مۇنداي تۇيىندەردى بەرىك ۇستاۋ، اتالعان ايماقتاعى ەلدەردىڭ، قاۋىپسىزدىك ورگاندارىنىڭ ماڭىزدى كۇن تارتىبىنە ەنۋى ءتيىس. قازاقستانداعى تەرروريزمگە قارسى تۇرۋ ءۇشىن سۇرياعا قازاقستاننان بارعان ەكسترەميستەردى تولىقتاي انىقتاپ، قازاقستان تەرريتورياسىنا كىرىپ، لاڭكەسىتك شابۋىلدار مەن ءدىني ەكسترەميستىك توپتار قالىپتاستىرۋىنىڭ الدىن الۋ شارالارى كەرەك.

“The Qazaq Times”