ەۋروپالىق كوميسسيا رەسەي تاراپىنان كەلەتىن جالعان اقپاراتپەن كۇرەسۋدىڭ جوسپارىن ازىرلەدى. ونىڭ باستى ماقساتى – 2019 جىلدىڭ مامىر ايىندا ەۋروپا پارلامەنتىنە جانە 2020 جىلى ەۋروپا ەلدەرىندە وتەتىن سايلاۋعا كرەمل تاراپىنان كەدەرگى كەلتىرۋگە جول بەرمەۋ.

ەۋرووداق جالعان اقپارات تاراتۋدا رەسەي باستى قاۋىپ دەپ بىلەدى. "سۇرياداعى سوعىس، ۋكرايناداعى MH17 ۇشاعىنىڭ اپاتقا ۇشىراۋى جانە سولسبەريدەگى حيميالىق شابۋىل كەزىندە رەسەيلىك جالعان مالىمەت تاراتۋ كامپانياسى كۇشتى جۇمىس ىستەدى. مۇنى دالەلدەيتىن قۇجاتتار دا بار. ەندى باسقا ەلدەر دە رەسەيدىڭ ءتاسىلىن ۇيرەنىپ، جالعان اقپارات تاراتۋ ستراتەگياسىن ەنگىزۋى مۇمكىن", – دەلىنگەن ەۋروپالىق كوميسسيا ۇسىنعان جوسپاردا.

قۇجاتتا جالعان اقپاراتپەن كۇرەسۋ ءۇشىن، ارنايى ينستيتۋتتار جۇمىسىن كۇشەيتۋ ۇسىنىلعان. سونىمەن بىرگە سىرتقى ساياسات مەكەمەسىنىڭ ستراتەگيالىق كوممۋنيكاتسيا جۇمىسىنىڭ بيۋدجەتىن ەكى ميلليون ەۋرودان بەس ميلليون ەۋروعا دەيىن ۇلعايتۋ قاراستىرىلعان.

"The Qazaq Times"