گەرمانيا رەسەيگە قارسى قىسىمدى ارتتىرماق

حدس پارتياسىنىڭ باس حاتشىسى اننەگرەت كرامپ-كاررەنباۋەر «ARD» تەلەارناسىنىڭ ەفيرىندە گەرمانيا رەسەيگە قاتىستى قاتاڭ پوزيتسيا ۇستانۋى ءتيىس دەپ مالىمدەدى.

ەكى ەل اراسىنداعى «سولتۇستىك اعىس – 2» جوباسىن توقتاتۋ ارقىلى گەرمانيا تاراپى رەسەيگە قارسى قىسىم كورسەتۋدى جوسپارلاپ وتىر. اتاپ ايتقاندا، رەسەي ۋكراينانىڭ ءۇش كەمەسىن باسىپ العان كەرچ بۇعازىنداعى وقيعالارعا بايلانىستى «سولتۇستىك اعىس – 2» گاز قۇبىرىنا بايلانىستى كەلىسىمدى قايتا قاراۋدى ۇسىندى. «ARD»-عا بەرگەن سۇحباتىندا كرامپ-كاررەنباۋەر: «گەرمانيا مەن ونىڭ وداقتاستارىنىڭ رەسەيگە قاتىستى ۇستانىمى وزگەرمەيدى، سەبەبى پۋتين كەرچ بۇعازىنداعى قاقتىعىستى بەيبىت جولمەن شەشكەن جوق»، – دەپ مالىمدەدى. سونداي-اق، ول Reuters اگەنتتىگىنە سۇحبات بەرىپ، ەو مەن اقش ازوۆ تەڭىزىندەگى جاعدايعا بايلانىستى رەسەيلىك كەمەلەردىڭ ەۋروپالىق پورتتارعا كىرۋىنە تىيىم سالۋ كەرەكتىگىن ايتتى. ونىڭ پىكىرىنشە، «سولتۇستىك اعىن – 2» قۇرىلىسىنا ساياسي قولداۋدى توقتاتىپ، بەرلين ماسكەۋدىڭ اگرەسسيۆتى ساياساتىنا جاۋاپ رەتىندە وسى قۇبىر ارقىلى جەتكىزىلەتىن تابيعي گاز كولەمىن شەكتەي الادى.

1 جەلتوقساندا گەرمانيا كانتسلەرى انگەلا مەركەل رەسەي پرەزيدەنتى ۆلاديمير پۋتينمەن كەزدەسىپ، ۋكراين تەڭىزشىلەرىن تۇتقىننان بوساتۋ تۋرالى تالاپ قويدى. سونىمەن قاتار، گەرمانياداعى حريستيان دەموكراتيالىق پارتياسى (حدپ) كوشباسشىلىعىنا كانديدات فريدريح مەرتس رەسەي مەن ۋكراينا اراسىنداعى قاقتىعىستان كەيىن «سولتۇستىك اعىس – 2» قۇرىلىسىن قايتا قاراۋ كەرەك دەيدى.

بىراق، گەرمانيا ءسىم بۇرىنعى باسشىسى حايكو مااس «سولتۇستىك اعىس – 2» جوباسىنان شىعۋعا بولمايتىنىن ايتتى. سەبەبى، قۇبىر كەز كەلگەن جاعدايدا سالىنادى، ەگەر گەرمانيا جوبادان شىقسا، ۋكراينا ارقىلى بالامالى باعىتتا گاز جەتكىزۋدى جالعاستىرۋ مۇمكىندىگىنەن ايىرىلۋى مۇمكىن.

اقش، ۋكراينا جانە شىعىس پەن ورتالىق ەۋروپا ەلدەرى قۇبىر قۇرىلىسىنىڭ جالعاسۋىنا تۇبەگەيلى قارسى، ويتكەنى بۇل ءوز اۋماعى ارقىلى رەسەي گازىنىڭ ءترانزيتى ءۇشىن سالىق الا المايتىن ۋكرايناعا كوپ كولەمدە زيان كەلتىرەدى. ۋاشينگتون بۇل گاز قۇبىرى الداعى ون جىلدىقتاردا گەرمانيانىڭ رەسەيگە ەنەرگەتيكالىق تاۋەلدىلىگىن ارتتىرادى دەپ سانايدى.

ايتا كەتەيىك، رەسەيلىك «گازپروم» «سولتۇستىك اعىس-2» كونسورتسيۋمىن باسقارادى. 11 ملرد دوللار بولاتىن قۇرىلىس كەلەسى جىلى اياقتالۋى كەرەك. قۇبىر جۇمىستارى رەسەي گازىنىڭ گەرمانياعا ۋكراينا اۋماعىن اينالىپ ءوتۋ كولەمىن ەكى ەسە ارتتىرۋ ماقساتىندا قولعا الىنعان.

"The Qazaq Times"