گرۋزيادا شەرۋشىلەر قايتا سايلاۋ وتكىزۋدى تالاپ ەتتى

گرۋزيانىڭ تبيليسي قالاسىندا مىڭداعان حالىق ەلدە وتكەن پرەزيدەنتتىك سايلاۋ قورىتىندىسىنا نارازىلىعىن ءبىلدىرىپ شەرۋگە شىقتى.

سايلاۋ ناتيجەسى بۇرمالاندى دەگەن نارازى توپ گرۋزيا مەن ەۋروپا وداعىنىڭ تۋلارىن ۇستاپ شىعىپ، پارلامەنت عيماراتىنىڭ الدىنا جينالدى. ولار سايلاۋ تۋرالى جاڭا زاڭ قابىلدانۋىن جانە كەزەكتى مارتە مەرزىمىنەن بۇرىن سايلاۋ وتكىزۋدى تالاپ ەتتى. ميتينگكە قاتىسۋشىلارمەن ينتەرنەت ارقىلى بايلانىسقا شىققان بۇرىنعى باسشى ميحايل سااكاشۆيلي «گرۋزيانىڭ بولاشاعى وسى الاڭدا انىقتالاتىن بولادى» دەگەن.

پرەزيدەنتتىك سايلاۋدىڭ ەكىنشى كەزەڭىندە سالومە زۋرابيشۆيلي 59,5% داۋىسپەن جەڭىسكە جەتكەن بولاتىن. ال 40,4%-عا داۋىسقا يە بولعان ونىڭ باستى قارسىلاسى گريگول ۆاشادزە سايلاۋدا كوپتەگەن زاڭ بۇزۋشىلىق بولعانىن ايتقان. سول سەبەپتى وپپوزيتسيونەرلەر سايلاۋ قورىتىندىسىنا قاتىستى سوتقا شاعىمداندى. گرۋزيا پرەزيدەنتتىگىنەن ۇمىتكەر گريگول ۆاشادزە: «گرۋزياداعى سايلاۋ ۋچاسكەلەرىنەن جالعان قۇجاتتار تابىلدى. بۇل 10 جىل بۇرىن قايتىس بولعان ادامداردىڭ تولقۇجاتتارى. دەمەك، ولار ءتىرىلىپ، سايلاۋعا داۋىس بەرۋگە كەلگەن عوي. ءبىزدىڭ دەموكراتيامىزدىڭ كورىنىسى وسى»، – دەيدى.
ايتا كەتەيىك، گرۋزياداعى پرەزيدەنت سايلاۋىندا زۋرابيۆشيلي قارسىلاسى گريگول ۆاشادزەنى 20%  داۋىس ايىرماشىلىعىمەن جەڭگەن. گرۋزيا تاريحىندا ءبىرىنشى رەت ايەل پرەزيدەنت اتانعان ول سايلاۋداعى جەڭىسىن «ەۋروپا جەڭىسى» دەپ اتادى.

"The Qazaq Times"