ۋكراينا رەسەي ازاماتتارىن شەكارادان وتكىزبەۋ تۋرالى شەشىم شىعاردى

ۋكراينا 16-دان 60 جاسقا دەيىنگى ەر ازاماتتارعا ەل اۋماعىنا كىرۋگە شەكتەۋ قويدى. بۇل تۋرالى ۋكراينا پرەزيدەنتى پەتر پوروشەنكو مالىمدەدى.

«شەكارادان وتكىزۋ پۋنكتتەرىندە كۇشەيتىلگەن باقىلاۋ شارالارى جۇرگىزىلۋدە. بۇگىندە رەسەي فەدەراتسياسىنىڭ ازاماتتارى ءۇشىن شەكارادان وتۋگە قاتاڭ شەكتەۋ قويىلادى. جاس شاماسىنا كەلەر بولساق، رەسەي فەدەراتسياسىنىڭ 16-دان 60 جاسقا دەيىنگى ازاماتتارىنا تىيىم سالىندى»، – دەدى ۋكراينا شەكارا قىزمەتىنىڭ باسشىسى پەتر تسيگيكال.

بۇعان دەيىن، 8 قاراشادا ۋكراينا پرەزيدەنتى پەتر پوروشەنكو مەملەكەتتىك شەكارانى زاڭسىز كەسىپ وتكەن «اگرەسسورلىق مەملەكەت» ياعني رەسەي ازاماتتارىن قىلمىستىق جاۋاپقا تارتۋ تۋرالى زاڭعا قول قويدى. ال بىلتىر كيەۆ تاراپى رەسەي اننەكسيالاعان قىرىمعا شەكارانى كەسىپ وتپەك بولعان 100-گە جۋىق رەسەيلىك ازاماتتارعا قاتاڭ تىيىم سالعان بولاتىن. جوعارى رادانىڭ ءباسپاسوز قىزمەتى حابارلاعانداي، جاڭا زاڭ جوباسى رەسەي مەن رەسەيشىل، مۇددەلەس مەملەكەتتەرگە قاتىستى. زاڭ ەرەجەلەرىنە ساي، كەدەن بەكەتىنەن زاڭسىز وتپەك بولعاندار نەمەسە ءبىر رەت كەسىپ وتكەندەر ءۇش جىلعا، ەكىنشى مارتە وتكەندەر بەس جىلعا، ال قارۋ قولدانباق بولعان ازاماتتار سەگىز جىلعا دەيىن باس بوستاندىعىنان ايىرىلادى. سونداي-اق، قۇجاتسىز جۇرگەن بوسقىندار دا جاۋاپكەرشىلىككە تارتىلادى.

"The Qazaq Times"