گرۋزيانىڭ جاڭادان سايلانعان پرەزيدەنتى سالومە زۋرابيشۆيلي گرۋزياعا جانە ۋكرايناعا قارسى اگرەسسياسى ءۇشىن رەسەيمەن ارىپتەستىك ورناتۋ مۇمكىندىگىنە كۇمان كەلتىرەدى. بۇل جونىندە ول BBC تەلەارناسىنا بەرگەن سۇحباتىندا مالىمدەدى.

زۋرابيشۆيلي رەسەيدى گرۋزيا تەرريتورياسىنا بىرتىندەپ ەنىپ، "وككۋپاتسيا سىزىعىنداعى" ازاماتتاردى ۇرلادى دەپ ايىپتادى. گرۋزيا ليدەرى ەلىنىڭ ەۋروپالىق باعىتتى ۇستاناتىنىن جانە ەۋروپاعا قاراي بوي تۇزەيتىنىن جەتكىزدى.

گرۋزيا بيلىگى وسىعان دەيىن رەسەيدى وڭتۇستىك وسەتيامەن شەكتەسەتىن ايماقتا ازاماتتاردى تۇتقىنداپ جاتىر دەپ بىرنەشە مارتە ايىپتاعان. ماسكەۋ بولسا، بۇل ايماقتى تاۋەلسىز مەملەكەت دەپ مويىنداپ، 4 مىڭ اسكەرىن ورنالاستىرعان. رەسەيدەن باسقا وڭتۇستىك وسەتيانى دەربەس ەل دەپ بەس مەملەكەت مويىنداعان. ابحازيا سەكىلدى وڭتۇستىك وسەتيا دا 2008 جىلى رەسەي اسكەرىنىڭ قاتىسۋىمەن بولعان كيكىلجىڭنەن كەيىن گرۋزيادان ءبولىنىپ شىققان. رەسەي ءوزىنىڭ بۇل ارەكەتىن «بىتىمگەرشىلىك وپەراتسياسى» دەپ اتاعان.

پرەزيدەنت سايلاۋىندا زۋرابيۆشيلي قارسىلاسى گريگول ۆاشادزەنى 20 پايىز داۋىس ايىرماشىلىعىمەن جەڭگەن. گرۋزيا تاريحىندا ءبىرىنشى رەت ايەل پرەزيدەنت اتانعان ول سايلاۋداعى جەڭىسىن "ەۋروپا جەڭىسى" دەپ اتادى. ەلدىڭ بۇرىنعى پرەزيدەنتى ميحايل سااكاشۆيلي جاقتاعان ۇمىتكەر ۆاشادزە سايلاۋ قورىتىندىسىن مويىندامادى. ول بيلىكتى سايلاۋشىلارعا قىسىم جاسادى، سايلاۋ ناتيجەسىن بۇرمالادى دەپ ايىپتادى. ونىڭ سوزىنشە، "گرۋزين ارمانى"جەڭىس ءۇشىن، قىلمىس الەمىمەن كەلىسىمگە كەلگەن. وپپوزيتسيالىق ۇمىتكەردىڭ جاقتاستارى تبيليسيدە ميتينگكە شىقپاق.

"The Qazaq Times"